નહીં થાય નવાઝુદ્દિન સિદ્દીકીની ધરપકડ, પત્નીએ લગાવ્યા હતા આ આરોપો

અલ્હાબાદ હાઈકોર્ટે નવાઝુદ્દીન સિદ્દીકીની અલગ રહી રહેલી પત્ની તરફથી દાખલ કરેલી છેડતીના એક કેસમાં અભિનેતાને રાહત આપી છે. કોર્ટે નવાઝુદ્દીન સિદ્દીકીની ધરપકડ પર રોક લગાવી છે. નવાઝના વકીલ ઝફર ઝૈદીએ આ માહિતી આપી હતી. ઝૈદીએ કહ્યું કે કોર્ટે નવાઝુદ્દીન, તેના બે ભાઈઓ ફયાઝુદ્દીન અને અયાઝુદ્દીન તેમજ માતા મેહરુન્નિસાની ધરપકડ પર રોક લગાવી છે. જોકે, તેના ત્રીજા ભાઈ મુનાઝુદ્દીને કોર્ટે રાહત આપી નથી.

શું હતી નવાઝુદ્દીનની પત્નીની ફરિયાદ?
નવાઝુદ્દીનથી અલગ રહેતી તેની પત્ની આલિયાએ 27 જુલાઈએ એક્ટર અને તેના ત્રણ ભાઈઓ સાથે માતા સામે પણ 2012માં તેના પર હુમલો કરવાની અને પરિવારની સગીર છોકરીની છેડતી કરી હોવાના આક્ષેપ સાથે આ લોકો વિરુદ્ધ ફરિયાદ નોંધાવી હતી.

પત્નીએ નોંધાવ્યું હતું નિવેદન
આ સંદર્ભે ભારતીય દંડ સંહિતા અને પોક્સો એક્ટની સંબંધિત કલમો હેઠળ કેસ નોંધવામાં આવ્યો હતો. આલિયા 14 ઓક્ટોબરે પોક્સો કોર્ટમાં હાજર થઈ હતી અને મહિલા મેજિસ્ટ્રેટ સમક્ષ પોતાનું નિવેદન નોંધાવ્યું હતું. નોંધનીય છે કે, અલગ અલગ ફિલ્મ્સમાં રસપ્રદ પાત્ર ભજવનારા નવાઝુદ્દીન સિદ્દીકીની 'બજરંગી ભાઈજાન'માં 'ચાંદ નવાબ'ની ભૂમિકા ખૂબ જ વખાણવામાં આવી હતી. જો કે આ આરોપો બાદ અનેક પ્રકારના સવાલો પણ ઉભા થઈ રહ્યા છે.