મુંબઈના ભારે વરસાદમાં વર્ષો જૂનું ઝાડ પડી ગયું, અમિતાભે માતાના નામથી ફરી વાવ્યું

અમિતાભ બચ્ચને પોતાના પિતા હરિવંશ રાય બચ્ચનની કેટલીક પંક્તિઓ લખી છે. આ બાદ તેઓ આગળ લખે છે, આ મોટા ગુલમહોરના વૃક્ષને મેં એક નાના છોડના રૂપમાં લગાવ્યું હતું, જ્યારે પોતાનું પહેલું ઘર પ્રતિક્ષા (1976)માં મળ્યું હતું... હાલમાં જ આવેલા તોફાને આ વૃક્ષને ધરાશાયી કરી દીધું. પરંતુ પોતાની માતાના બર્થડે 12 ઓગસ્ટે મેં એક નવા ગુલમહોરને તે જ જગ્યાએ માતાના નામથી લગાવ્યું છે.

ઉલ્લેખનીય છે કે થોડા સમય પહેલા જ અમિતાભ બચ્ચન કોરોના સામેની જંગ લડીને ઘરે પાછા આવ્યા છે. તેઓ મુંબઈની નાણાવટી હોસ્પિટલમાં પોતાની સારવાર કરાવી રહ્યા હતા. થોડા દિવસો પહેલા જ તેમને હોસ્પિટલમાંથી રજા મળી હતી. જ્યારે અભિષેક બચ્ચન પણ કોરોનાને હરાવીને ઘરે પાછો આવ્યો હતો.

નોંધનીય છે કે જુલાઈ મહિનામાં બચ્ચન પરિવારના ચાર સદસ્યો કોરોના પોઝિટિવ આવ્યા હતા. અમિતાભ બચ્ચન અને અભિષેક બચ્ચનની સાથે ઐશ્વર્યા રાય બચ્ચન અને આરાધ્યા બચ્ચન કોરોના પોઝિટિવ આવ્યા બાદ ચારેયને હોસ્પિટલમાં એડમિટ કરાયા હતા. જોકે ઐશ્વર્યા અને આરાધ્યા પહેલા જ સ્વસ્થ થઈ જતા તેમને રજા આપી દેવાઈ હતી.