અનુષ્કા શર્માએ પોતાને ગણાવી 'સીરિયલ ચિલર', ડોગી સાથે આરામ કરતી જોવા મળી

બોલિવુડ એક્ટ્રેસ અનુષ્કા શર્મા આ મહિને બાળકને જન્મ આપવાની છે. હાલ તે પ્રેગ્નેન્સીના સમયગાળાને મન ભરીને માણી રહી છે. આ સિવાય તે સોશિયલ મીડિયા પર પણ એક્ટિવ જોવા મળી રહી છે. હાલમાં તેણે ઈન્સ્ટાગ્રામ પર પોતાની એક તસવીર શેર કરી છે. જેમાં તે ડોગી સાથે આરામ કરતી જોવા મળી રહી છે. આ તસવીરને શેર કરીને એક્ટ્રેસે પોતાને સીરિયલ ચિલર બતાવી છે.


તસવીરના કેપ્શનમાં અનુષ્કા શર્માએ લખ્યું છે કે, 'ઘરમાં સીરિયલ ચિલર'. આ તસવીરમાં એક્ટ્રેસ તેના ડોગીની બાજુમાં આરામથી ઊંઘતી દેખાઈ રહી છે. તે ડોગીના માથા પર હાથ ફેરવીને તેને પંપાળી રહી છે. એક્ટ્રેસનો આ અંદાજ તેના ફેન્સને ખૂબ પસંદ આવી રહ્યો છે. તસવીરમાં તેણે વ્હાઈટ કલરના આઉટફિટ પહેર્યા છે જેમાં તેનો હેવી બેબી બમ્પ સ્પષ્ટ દેખાઈ રહ્યો છે.


અનુષ્કા શર્માએ હાલમાં જ એક મેગેઝિન માટે ફોટોશૂટ કરાવ્યું હતું. જેની તસવીરો તેણે ઈન્સ્ટાગ્રામ પર શેર કરી હતી. મેગેઝિનને આપેલા ઈન્ટરવ્યૂમાં અનુષ્કાએ પોતાની પ્રેગ્નેન્સી વિશે પણ વાત કરી હતી. તેણે કહ્યું હતું કે, 'લોકડાઉનના કારણે મેં ઘરે ઘણો સમય વિતાવ્યો. આ દરમિયાન કોઈને ગંધ પણ ના આવી કે હું પ્રેગ્નેન્ટ છું. એક પ્રકારે આ કોરોના મહામારી વિચિત્ર સ્વરૂપે વરદાન જેવી રહી. વિરાટ મારી સાથે હતો અને હું પ્રેગ્નેન્સી સિક્રેટ રાખવા માગતી હતી. અમે માત્ર ડૉક્ટરના ત્યાં જવા ઘરની બહાર નીકળતા હતા. એ વખતે રસ્તા પર કોઈ હોતું નહીં માટે અમે કોઈની નજરે પણ નહોતા ચડતા'.


અનુષ્કાએ ઈન્ટરવ્યૂમાં તેમ પણ જણાવ્યું હતું કે, તેણે અને વિરાટે બાળકને સોશિયલ મીડિયાથી દૂર રાખવાનું વિચાર્યું છે. એક્ટ્રેસે કહ્યું હતું કે, 'અમે આ વિશે ઘણું વિચાર્યું. અમે કોઈપણ ભોગે બાળકને લોકોની નજરોમાં રાખીને નથી ઉછેરવા માગતા. અમે અમારા બાળકને સોશિયલ મીડિયા પર એન્ગેજ નથી રાખવા માગતા. મને લાગે છે આ નિર્ણય મા-બાપે બાળક માટે લેવાનો હોય છે. કોઈપણ બાળકને અન્યો કરતાં સ્પેશિયલ ના બનાવવું જોઈએ. આ મુશ્કેલ રહેશે પરંતુ અમે તેનું પાલન કરીશું'. ઉલ્લેખનીય છે કે, કપલે ઓગસ્ટ મહિનામાં અનુષ્કાની બેબી બમ્પ ફ્લોન્ટ કરતી તસવીર શેર કરીને ફેન્સને ગુડ ન્યૂઝ આપ્યા હતા.