સેલિબ્રિટી ફેશન ડિઝાઈનર પ્રત્યુષા ગરિમેલાનું મોત, ઘરમાંથી મળી આવ્યો મૃતદેહ

સેલિબ્રિટી ફેશન ડિઝાઇનર પ્રત્યુષા ગરિમેલા શનિવારે હૈદરાબાદના તેલંગાણામાં બંજારા હિલ્સ સ્થિત નિવાસસ્થાને શંકાસ્પદ સંજોગોમાં મૃત હાલતમાં મળી આવી હતી. ઉલ્લેખનીય છે કે, તે પ્રથ્યુષા ગરિમેલા નામના પોતાના લેબલની સ્થાપક હતી, તે બંજારા હિલ્સમાં ફેશન સ્ટુડિયો ચલાવતી હતી અને તેના ટોલીવુડ, બોલિવૂડ અને અન્ય સેક્ટર્સમાં ટોપના ક્લાઈન્ટ્સ પણ હતા.

પોલીસે લાશને પોસ્ટમોર્ટમ માટે ખસેડ્યો
બંજારા હિલ્સના સર્કલ ઈન્સ્પેક્ટરે જણાવ્યું છે કે તે બાથરૂમમાં પડેલી મળી હતી અને તેના મૃતદેહને પીએમઈ માટે ઓસ્માનિયા હોસ્પિટલમાં ખસેડવામાં આવ્યો છે. તેણીનું મૃત્યુ આત્મહત્યાથી થયું હોવાની આશંકા છે.

શંકાસ્પદ મૃત્યુ સંબંધિત નોંધાયો કેસ
પોલીસે તેના બેડરૂમમાંથી કાર્બન મોનોક્સાઇડ સિલિન્ડર જપ્ત કર્યું છે. બંજારા હિલ્સમાં શંકાસ્પદ મૃત્યુ સંબંધિત જોગવાઈઓ હેઠળ કેસ નોંધવામાં આવ્યો છે અને વધુ તપાસ હાથ ધરવામાં આવશે.

પોલીસ તપાસમાં સામે આવશે મોતનું કારણ!
ગયા વર્ષે, પ્રથ્યુષાએ ફેમિનાને કહ્યું હતું કે તેણીની ફેશન કારકિર્દી શરૂ કરતા પહેલા તેણીએ તેના માસ્ટર્સ માટે યુકેમાં અભ્યાસ કર્યો હતો અને ત્યારબાદ તેણી તેના પિતાના વ્યવસાય - એલઇડી ઉત્પાદન કંપનીમાં જોડાઈ હતી. જો કે, ટૂંક સમયમાં જ પ્રત્યુષાને ખબર પડી કે તે નોકરી માટે નહીં પરંતુ તેનો ઈન્ટરેસ્ટ બીજે ક્યાંક છે. હાલ ઘટનાને પગલે આસપાસમાં ચકચાર મચી છે. ઉલ્લેખનીય છે કે, છેલ્લા એક મહિનાની અંદર અનેક એક્ટ્રેસેસના શંકાસ્પદ હાલતમાં મોત થયાની ઘટનાઓ સામે આવી ચૂકી છે. હવે પ્રત્યુષાએ આપઘાત કર્યો છે કે બીજું કંઈક છે તે પોલીસ તપાસમાં સામે આવી શકે છે.