ફિલ્મ ટેક્નીશિયનનો દાવો- બોલિવૂડને ડ્રગ્સની લત, નશા વિના એક્ટિંગ નથી કરી શકતા એક્ટર્સ

સુશાંત સિંહ રાજપૂતના મોતના કેસમાં CBIની ટીમ તપાસ કરી રહી છે અને દરેક એંગલને ધ્યાને લઈ રહી છે. બીજી તરફ કેસની મુખ્ય આરોપી રિયા ચક્રવર્તીની ડ્રગ ચેટ સામે આવ્યા બાદ આ કેસમાં NCBએ પોતાની દખલગિરી નોંધાવી છે. બીજી તરફ રિયાએ ઈન્ટરવ્યૂ દરમિયાન કહ્યું છે કે, સુશાંત ડ્રગ્સ લેતો હતો. બોલિવૂડ અને ડ્રગ્સ કનેક્શન અંગે અમારી સહયોગી ચેનલ ટાઈમ્સ નાઉએ એક ફિલ્મ ટેક્નીશિયન સાથે વાત કરી ત્યારે તેણે દાવો કર્યો કે, ડ્રગ્સ વિના એક્ટર્સ એક્ટિંગ કરી શકતા જ નથી.

ડ્રગ્સ વિના નથી નીકળતી રિયલ એક્ટિંગ

ટેક્નીશિયને જણાવ્યું કે, 'ડ્રગ્સ બોલિવૂડ માટે ખૂબ સામાન્ય વસ્તુ છે અને નાનામાં નાનો આર્ટિસ્ટ હોય કે, મોટામાં મોટો સ્ટાર, આની લતમાં સપડાયેલો છે. તે લોકો વેનિટી વાનમાં પણ ડ્રગ્સ લે છે અને પાર્ટીઝમાં પણ ડ્રગ્સ લે છે અને તેમને ક્યાંક ને ક્યાંકથી મળી જ જાય છે. મને ઈન્ડસ્ટ્રીમાં 12થી વર્ષ થઈ ગયા છે અને મેં જોયું છે કે, નાનો હોય કે મોટો, કોઈપણ એક્ટર ડ્રગ્સ ન લે ત્યાં સુધી તેની અંદરથી એક્ટિંગ નીકળી શકતી નથી. ઘણા બધા નૉર્મલ એક્ટર એવા હશે જે આના વિના એક્ટિંગ કરી શકતા નથી. આટલા વર્ષોથી જોયું છે કે, જ્યાં સુધી નશો ન કરે ત્યાં સુધી રિયલ એક્ટિંગ થઈ શકતી નથી.'


બોલિવૂડમાં સરળતાથી મળી જાય છે ડ્રગ્સ

ટેક્નીશિયને જણાવ્યું કે, 'મોટા આર્ટિસ્ટનું ડ્રગ્સ અલગ પ્રકારનું હોય છે અને નૉર્મલ આર્ટિસ્ટનું અલગ. નાના આર્ટિસ્ટ ગાંજો અને ચરસ લે છે. નશા વિના અહીં કશું જ નથી. આજ સુધી મેં જેટલા પર સારા આર્ટિસ્ટ જોયા છે તે ડ્રગ્સ અને નશા વિના એક્ટિંગ કરી શકતા નથી. જેવી જૂના આર્ટિસ્ટ એક્ટિંગ કરતા હતા તેવી તો આજકાલના આર્ટિસ્ટ નશો કરીને પણ નથી કરી શકતા. આજકાલ 18-20 કલાક શૂટ કરવાથી અને વધુ પ્રૉજેક્ટ લેવાથી આર્ટિસ્ટ થાકી જાય છે તો બની શકે તેના માટે ડ્રગ્સ લેતો હોય. ડ્રગ્સ ઈન્ડિયામાં પ્રતિબંધિત છે અને મળવું બહુ મોટી વાત છે પણ કંઈક તો એવું છે કે, બોલિવૂડને સરળતાથી મળી જાય છે.'