વેબ સીરિઝ 'અભય 2'માં શહીદ ખુદીરામ બોઝને ક્રિમિનલ બતાવાયા!

હાલના સમયમાં ઓટીટી પ્લેટફોર્મ પર સતત વેબ સીરિઝ રિલીઝ થઈ રહી છે. તાજેતરમાં જ રિલીઝ થયેલી વેબ સીરીઝ 'અભય 2'ને લઈને એક વિવાદ ઊભો થઈ ગયો છે. હકીકતમાં, આ સીરિઝના એક સીનમાં ક્રિમિનલ બોર્ડ પર શહીદ ખુદીરામ બોઝની તસવીર દેખાઈ રહી છે. જેના કારણે લોકો ઝી5ને બોયકોટ કરવાની માગ કરી રહ્યા છે. તો, ચેનલે માફી માગી લીધી છે.

'અભય 2'ના એક સીનમાં પોલીસ સ્ટેશનમાં ગુનેગારોની તસવીરોની વચ્ચે સ્વતંત્રતા સેનાની ખુદીરામ બોઝની તસવીર લગાવાયેલી દેખાઈ રહી છે. આ સીનમાં કુણાલ એક ખુરશી પર બેસીને આરોપીની પૂછપરછ કરતો દેખાઈ રહ્યો છે. ઈન્ટરનેટ પર આ સીનના સ્ક્રીન શોટ ઘણા વાઈરલ થઈ રહ્યા છે.

ઝી5 અને 'અભય 2'ના ડાયરેક્ટર કેન ઘોષે માફી માગી લીધી છે. ઝી5 સપોર્ટ કીએ પહેલા ટ્વીટ કરતા લખ્યું કે, 'એપિસોડ જલદી આવશે. અમે આ ભૂલ માટે વિના શરત માફી માગીએ છીએ.' તો, બીજી ટ્વીટમાં લખ્યું કે, 'શોના પ્રોડ્યૂસર, શો અને પ્લેટફોર્મનો હેતુ કોઈ સમુદાય કે વ્યક્તિને દુઃખ પહોંચાડવાનો ન હતો. ઓડિયન્સ તરફથી મળેલા ફીડબેક અને તેમના સન્માનને ધ્યાનમાં રાખતા અમે અભય 2ના આ સીનમાં તસવીરને બ્લર કરી દીધી છે.'



'અભય 2' વેબ સીરિઝ વર્ષ 2019માં આવેલી 'અભય' વેબ સીરિઝની જ બીજી સીઝન છે. તેમાં કુણાલ ખેમૂની સાથે આશા નેગી, રામ કપૂર, નિધિ સિંહ, ચંકી પાંડે, રાઘવ જુયાલ અને બિદિતા બાગ પણ જોવા મળશે.

ઉલ્લેખનીય છે કે, ખુદીરામ બોઝે ભારતીય સ્વતંત્રતા સેનાનીઓ પર અત્યાચાર માટે કુખ્યાત બ્રિટિશ મેજિસ્ટ્રેટ ડગલસ કિંગ્સફોર્ડની હત્યા કરવાનો પ્રયાસ કર્યો હતો. તે પછી તેમને 18 વર્ષની ઉંમરે 11 ઓગસ્ટ 1908એ ફાંસી આપવામાં આવી હતી. ખુદીરામ બોઝ ભારતના બીજા સૌથી યુવા સ્વતંત્રતા સેનાની હતા.