ડ્રગ્સ કેસ: NCBની ઓફિસ પહોંચી અર્જુન રામપાલની ગર્લફ્રેન્ડ ગેબ્રિએલા

સુશાંત સિંહ રાજપૂતના મોત કેસમાં ડ્રગ્સ એંગલની તપાસ કરી રહેલા નાર્કોટિક્સ કંટ્રોલ બ્યૂરો (NCB)એ બે દિવસ પહેલા જ એક્ટર અર્જુન રામપાલના ઘરે દરોડા પાડ્યા હતા. દરોડા બાદ નાર્કોટિક્સ કંટ્રોલ બ્યૂરોએ અર્જુન રામપાલ અને ગર્લફ્રેન્ડ ગેબ્રિએલા ડેમેટ્રિએડ્સને પૂછપરછ માટે સમન્સ મોકલ્યું હતું. બુધવારે સવારે ગેબ્રિએલા નાર્કોટિક્સ કંટ્રોલ બ્યૂરોની ઓફિસે પહોંચી છે.

મીડિયા રિપોર્ટ પ્રમાણે, અર્જુન રામપાલના મુંબઈ સ્થિત ઘરેથી દરોડા દરમિયાન કેટલીક પ્રતિબંધિત દવાઓ મળી આવી હતી. નાર્કોટિક્સ કંટ્રોલ બ્યૂરોના અધિકારીઓનું કહેવું છે કે, અર્જુન અને ગેબ્રિએલાએ જણાવવું પડશે કે તેમની પાસે આ દવાઓ ક્યાંથી આવી, આ દવાઓ માટે તેમની પાસે કોઈ લીગલ પ્રિસ્ક્રિપ્શન છે કે કેમ. ઉલ્લેખનીય છે કે, આવી દવાઓ રાખવા માટે ડૉક્ટરનું પ્રિસ્ક્રિપ્શન હોવું જરૂરી છે નહીં તો આ દવાઓ રાખવી NDPS એક્ટ હેઠળ ગેરકાયદે ગણાય છે.


ઉલ્લેખનીય છે કે, આ પહેલા નાર્કોટિક્સ કંટ્રોલ બ્યૂરોએ ગેબ્રિએલાના ભાઈની ધરપકડ કરી હતી. અગિસિયાલોડ ડેમેટ્રિએડ્સ પાસેથી નાર્કોટિક્સ કંટ્રોલ બ્યૂરોને હશીશ અને એલપ્રાઝોલમ ટેબલેટ મળી હતી. NCBનું કહેવું છે કે, અગિસિયાલોસ એક મોટા ડ્રગ સિન્ડિકેટનો ભાગ છે.

જણાવી દઈએ કે, અર્જુન રામપાલના ઘરે રેડ પહેલા નાર્કોટિક્સ કંટ્રોલ બ્યૂરોએ ફિલ્મમેકર ફિરોઝ નડિયાદવાલાના ઘરે પણ દરોડા પાડ્યા હતા. ફિરોઝ નડિયાદવાલાની પત્ની શબાના સઈદની ધરપકડ કરી હતી. NCBના અધિકારી સમીર વાનખેડેએ અમારા સહયોગી ઈટામ્સને જણાવ્યું હતું, "અમે પશ્ચિમ મુંબઈ અને નવી મુંબઈમાં મોટાપાયે દરોડા પાડ્યા હતા. આ દરમિયાન અમને કોમર્શિયલ પ્રમાણમાં ગાંજો, મેફેડ્રોન અને અન્ય ડ્રગ્સ મળી આવ્યા હતા. અમે પાંચ પેડલર્સની પૂછપરછ કરી હતી અને તેના આધારે અમે રેડ પાડી હતી."