સ્ટેશન પર ગીત ગાઈને રાતોરાત ફેમસ થયેલી રાનૂ મંડલની જિંદગી હવે બદલાઈ છે. રાનૂ મંડલે લતા મંગેશકરનું ગીત ‘એક પ્યાર કા નગમા હૈ’ ગાયું હતું. જેનો વીડિયો સોશિયલ મીડિયા પર વાયરલ થયો હતો. ત્યારબાદ રાનૂનું મેકઓવર કરી આપનારની લાઈન લાગી હતી. રાનૂને ઘણા શોમાં ગાવાની ઓફર આવવા લાગી. દરમિયાન બોલિવુડના જાણીતા સંગીતકાર-ગાયક હિમેશ રેશમિયાએ રાનૂને પોતાની નવી ફિલ્મમાં ગીત ગાવાની તક આપી.હિમેશ રેશમિયાની આગામી ફિલ્મ ‘હેપ્પી હાર્ડી એન્ડ હીર’ છે. આ ફિલ્મમાં રાનૂએ ‘તેરી મેરી કહાની’ નામનું ગીત ગાયું છે. હિમેશ રેશમિયાએ એક વીડિયો શેર કર્યો છે. જેમાં રાનૂ આ ગીત રેકોર્ડ કરતી જોવા મળે છે. જેમાં રેશમિયા સાથે ઊભો રહીને ગીત રેકોર્ડ કરવામાં રાનૂની મદદ કરતો જોવા મળે છે. જો કે, હિમેશે ભલે રાનૂનો ગાવાનો ચાન્સ આપ્યો હોય પરંતુ તેની પાછળ સલમાન ખાનનો ફાળો છે.
એક ઈન્ટરવ્યૂમાં હિમેશ રેશમિયાએ પોતે આ વાતનો ખુલાસો કર્યો છે. હિમેશે કહ્યું, “સલમાન ભાઈના પિતા સલીમ અંકલે એકવાર મને સલાહ આપી હતી કે, જીવનમાં જ્યારે પણ કોઈ ટેલેન્ટેડ વ્યક્તિને મળે તો એને જવા ના દેતો. એ વ્યક્તિને ટેલેન્ટના બળે આગળ વધવામાં મદદ કરજે.” ઉલ્લેખનીય છે કે, રાનૂ મંડલ ટૂંક સમયમાં જ રિયાલિટી શો સુપરસ્ટાર સિંગરમાં જોવા મળશે. જેમાં તે હિમેશ રેશમિયા અને અન્ય જજ સાથે શોમાં ભાગ લેશે અને બાળકો સાથે મુલાકાત કરશે. શોમાં રાનૂ પોતાનું ટેલેન્ટ પણ દેખાડશે.રાનૂ મંડલ પશ્ચિમ બંગાળના કૃષ્ણાનગરની રહેવાસી છે. રાનૂનો ઉછેર તેના કાકીએ કર્યો છે. રાનૂએ નાની ઉંમરે જ માતા ગુમાવી હતી. પોતાનું ગુજરાન ચલાવવા તે રેલવે સ્ટેશન અને લોકલ ટ્રેનમાં ગીતો ગાતી હતી. આ દરમિયાન એક મુસાફરે તેમનો વીડિયો રેકોર્ડ કરીને સોશિયલ મીડિયા પર મૂકતા વાયરલ થયો હતો. અને હવે તેની જિંદગી બદલાઈ ગઈ છે.