એકબીજાના થયા કાજલ અગ્રવાલ અને ગૌતમ કિચલૂ, મુંબઈની હોટેલમાં કર્યા લગ્ન

ઈન્ડિયન એક્ટ્રેસ કાજલ અગ્રવાલે તેના બોયફ્રેન્ડ ગૌતમ કિચલૂની સાથે મુંબઈની એક હોટેલમાં લગ્ન કરી લીધા છે. કોરોના વાયરસની મહામારીના કારણે કાજલ અગ્રવાલ અને ગૌતમ કિચલૂના લગ્નમાં માત્ર ઘરના સભ્યો જ સામેલ થયા હતા. ત્યારે હવે કાજલ અગ્રવાલ અને ગૌતમ કિચલૂના લગ્નનો ફોટોગ્રાફ જોવા મળ્યો છે. જેમાં તેઓ ખૂબ જ સુંદર લાગી રહ્યા છે.

મોટાભાગે સાઉથ ઈન્ડિયન ફિલ્મો કરનાર એક્ટ્રેસ કાજલ અગ્રવાલ બોલિવૂડમાં વર્ષ 2011માં આવેલી ફિલ્મ 'સિંઘમ'થી પોપ્યુલર થઈ હતી. તારીખ 6 ઓક્ટોબર, 2020ના રોજ એક્ટ્રેસ કાજલ અગ્રવાલે એ પ્રકારે જાહેરાત કરી હતી કે તે થોડા દિવસોમાં જ બૉયફ્રેન્ડ ગૌતમ કીચલૂ સાથે લગ્ન કરવા જઈ રહી છે. એક્ટ્રેસ કાજલ અગ્રવાલે જે બોલિવૂડ ફિલ્મોમાં એક્ટિંગ કરી છે તેમાં 'સિંઘમ', 'ક્યું! હો ગયા ના...', 'સ્પેશિયલ 26'નો સમાવેશ થાય છે.

એક્ટ્રેસ કાજલ અગ્રવાલે સૌપ્રથમ સોશિયલ મીડિયા પર જણાવ્યું હતું કે મને એ વાતનો આનંદ થઈ રહ્યો છે કે હું ગૌતમ કિચલુની સાથે તારીખ 30 ઓક્ટોબર, 2020ના દિવસે મુંબઈમાં લગ્ન કરવા જઈ રહી છું. જેમાં અમારા પરિવારના લોકો હાજર રહેશે. હાલ કોરોના વાયરસની મહામારી ચાલી રહી છે તેમ છતાં અમે અમારા જીવનને એકસાથે શરૂ કરવા માટે ઉત્સાહી છીએ. મને તે વાતનો પણ ખ્યાલ છે કે તમે પણ અમારી સાથે ખુશ છો.

અહીં નોંધનીય છે કે કાજલ અગ્રવાલનો પતિ ગૌતમ કિચલૂ એક ઉદ્યોગપતિ છે. તે ઈન્ટિરિયર ડિઝાઈન અને હોમ ડેકોરેશન સાથે જોડાયેલી ઈ-કોમર્સ પ્લેટફોર્મ 'ડિસર્ન લિવિંગ (Discern Living)નો ફાઉન્ડર છે.' તેણે અમેરિકાની મેસેચ્યુસેટ્સ યુનિવર્સિટીમાંથી ઉચ્ચ અભ્યાસ કર્યો છે. આ પછી તેણે INSEAD ફ્રાન્સમાંથી બિઝનેસનો અભ્યાસ કર્યો. તેઓ પોતાની ઈન્ટિરિયર ડિઝાઈન કંપની પહેલા FabFurnishના વાઈસ પ્રેસિડેન્ટ અને lifestyle brand, The Elephant Companyના સીઈઓ હતા. ગૌતમની કંપની ડિઝાઈન હાઉસ 'રૂમ્સ' છે, જે ફર્નીચર, ડેકોર આઈટમ, પેઈન્ટિંગ અને અન્ય હાઉસહોલ્ડનો સામાન વેચે છે.