કંગનાનો જયા બચ્ચન પર પલટવાર, કહ્યું- સુશાંતની જગ્યાએ અભિષેક હોત તો પણ આવું કહેતા?

કંગના રનૌત સતત ચર્ચામાં રહે છે. તે સોશિયલ મીડિયા પર ઘણીવાર પોતાના વિચારો મક્કમતાથી મૂકતી હોય છે. શિવસેના સાથેની તકરાર બાદ તે હવે વધુ એક ટ્વીટના કારણે ચર્ચામાં આવી ગઈ છે. આ વખતે કંગનાએ જયા બચ્ચનને લઈને ટ્વીટ કર્યું છે.

કંગના પોતાના ટ્વીટમાં લખે છે, જયા જી, તમે ત્યારે પણ આવી જ વાત કરશો, જ્યારે મારી જગ્યાએ તમારી દીકરી શ્વેતાને ટીનએજમાં મારવામાં આવી હોત, ડ્રગ આપવામાં આવે અને છેડછાડ કરવામાં આવે. શું તમે ત્યારે પણ આવું જ કહેતા જો અભિષેક સતત બુલિંગ અને ઉત્પીડનની ફરિયાદ કરે અને એક દિવસ ફાંસી પર લટકતો જોવા મળે?

કંગનાએ આ ઉપરાંત અન્ય ટ્વીટમાં લખ્યું, તે વિચાર કે ગરીબને રોટલી મળી તો ઘણું છે, તેને બદલવાની જરૂર છે. ગરીબોને રોટલી સાથે સન્માન અને પ્રેમ પણ જોઈએ. મારી પાસે રિફોર્મની આખી લિસ્ટ છે જેને કેન્દ્ર સરકાર પાસેથી વર્કર્સ અને જૂનિયર આર્ટિસ્ટ માટે ઈચ્છું છું. એક દિવસે જ્યારે પણ હું આદરણીય પ્રધાનમંત્રીને મળીશ તો આ વિષયમાં જરૂર વાતચીત કરીશ.

હકીકતમાં સમાજવાદી પાર્ટીના સાંસદ જયા બચ્ચને રાજ્યસભામાં કહ્યું હતું કે, ડ્રગ્સથી બોલિવૂડને બદનામ કરવાનું ષડયંત્ર કરાઈ રહ્યું છે. જે લોકોએ ફિલ્મ ઈન્ડસ્ટ્રીના સહારે નામ કમાયું છે તેમણે તેને 'ગટર' કહી. તેમના આ નિવેદન પર કંગનાએ રિએક્ટ કર્યું છે.

એક્ટ્રેસ અને સાંસદ જયા બચ્ચને કહ્યું, "મનોરંજન ઈન્ડસ્ટ્રીમાં ઘણા લોકો એવા છે જે સૌથી વધારે ટેક્સ ભરે છે. તેમ છતાં તેમને હેરાન કરવામાં આવી રહ્યા છે. અમારી ઈન્ડસ્ટ્રીને ઘણાં વચનો આપવામાં આવે છે પરંતુ પૂરા નથી થતા. સરકારે મનોરંજન ઈન્ડસ્ટ્રીનો સાથ આપવો જોઈએ કારણકે ઈન્ડસ્ટ્રી દરેક વખતે સરકારની મદદ માટે આગળ આવે છે."

લોકસભામાં બોલિવૂડના ડ્રગ્સ કનેક્શન પર બીજેપીના સાંસદ રવિ કિશને પણ જયાને જવાબ આપ્યો છે. તેમણે કહ્યું, મને લાગ્યું કે મેં જે પણ કીધું જયાજી તેનું સમર્થન કરશે. ઈન્ડસ્ટ્રીમાં બધા ડ્રગ્સ નથી લેતા પરંતુ કેટલાક લોકો દુનિયાની સૌથી મોટી ફિલ્મ ઈન્ડસ્ટ્રીને બરબાદ કરવાના પ્લાનનો ભાગ છે. બીજેપી નેતાએ કહ્યું, હું પોતે બનાવેલી થાળીમાં કાણું નતી પડતો. બોલિવૂડના ડ્રગ્સ નેક્સસની વાત કરી હતી. જયા બચ્ચનના નિવેદનથી હેરાન છું.