ઓફિસ પહોંચી કંગના રનૌત, તોડફોડ અંગેની સુનાવણી 22 સપ્ટેમ્બર સુધી ટળી

મુંબઈઃ બોલીવૂડ અભિનેત્રી કંગના રનૌત અને મહારાષ્ટ્ર સરકાર વચ્ચેનો વિવાદ વધી રહ્યો છે. બૃહન્મુંબઈ મ્યુનિસિપલ કોર્પોરેશને (બીએમસી) કંગના રનૌતની ઓફિસમાં જે તોડફોડ કરી છે તેનાથી તે ઘણી જ નારાજ છે. કંગનાની બહેન રંગોલીએ ગુરૂવારે ઓફિસ જઈને ત્યાંની પરિસ્થિતિ વિશે માહિતી મેળવી હતી. કહેવામાં આવી રહ્યું છે કે તેણે ઓફિસની કેટલીક તસવીરો લીધી છે અને વિડીયો પણ બનાવ્યા છે. આ દરમિયાન કંગનાએ વધુ એક વખત ઉદ્ધવ ઠાકરે સરકાર વિરુદ્ધ ટ્વિટ કર્યું છે. મુંબઈના વિક્રોલી પોલીસ સ્ટેશનમાં કંગના વિરુદ્ધ એફઆરઆઈ પણ દાખલ થઈ છે. કંગનાની બીએમસી વિરુદ્ધ અરજી પર સુનાવણી થવાની હતી જેને 22 સપ્ટેમ્બર સુધી ટાળી દેવામાં આવી છે.

સુનાવણી ટળ્યા કંગના ઘરેથી ઓફિસ પહોંચી
મનાલીથી આવ્યા બાદ કંગના ગુરૂવારે પ્રથમ વખત ઘરની બહાર નીકળીને પોતાની ઓફિસ ગઈ હતી. કંગનાએ ત્યાં થયેલી તોડફોડની માહિતી મેળવી હતી. તેણે તસ્વીરો પણ ક્લિક કરી હતી.
કોર્ટે 22 સપ્ટેમ્બર સુધી ટાળી સુનાવણી
કંગનાએ બીએમસીની તોડફોડ વિરુદ્ધ બોમ્બે હાઈકોર્ટમાં અપીલ કરી હતી. ગુરૂવારે બપોરે 3 વાગે વિડીયો કોન્ફરન્સિંગ દ્વારા સુનાવણી થવાની હતી. જોકે, કોર્ટે સુનાવણી ટાળી દીધી છે. કોર્ટે કંગનાના વકીલ રિઝવાન સિદ્ધિકીને અરજીમાં કેટલાક સુધારા કરવાનું કહ્યું છે. કોર્ટે કહ્યું છે કે તમે ઉતાવળમાં પિટિશન ફાઈલ કરી છે. થોડો સમય લો. પછી ફરીથી સારી રીતે પિટિશન ફાઈલ કરજો. તેના પર 22 તારીખ બાદ સુનાવણી થશે. કોર્ટે તે પણ કહ્યું છે કે 22 સપ્ટેમ્બર સુધી ઓફિસમાં કોઈ તોડફોડ ન થવી જોઈએ કે કોઈ બાંધકામ પણ થવું જોઈએ નહીં. ઓફિસમાં વિજળી અને પાણીની પાઈપલાઈન કાપવામાં આવી છે. તેને પણ શરૂ કરવા માટે રોક લગાવવામાં આવી છે.
કોર્ટે બંને પક્ષોને કહ્યું છે કે ઉતાવળ ન કરે
કોર્ટે બીએમસીને કહ્યું છે કે કોમર્શિયલ પ્રોપર્ટી છે, તેના પર કંગનાના વકીલે કહ્યું છે કે આ રહેણાક વિસ્તાર છે. પહેલા અહીં એક બંગલો હતો બાદમાં કંગનાએ ખરીદ્યો હતો અને ઓફિસ બનાવી હતી. કોર્ટે બીએમસી અને રિઝવાન સિદ્દિકી બંનેને કહ્યું છે કે આ મામલે ઉતાવળ કરવી જોઈએ નહીં. પહેલા રિઝવાન સિદ્દિકી અરજીને સારી રીતે તૈયાર કરે અને બાદમાં બીએમસી તેના પર જવાબ આપે. ઘણા બધા એમેન્ડમેન્ટ્સ થયા છે અને ઘણા બધા દસ્તાવેજો સામેલ કરે. કંગનાના વકીલને હવે કોર્ટ સામે દસ્તાવેજો રજૂ કરવા પડશે કે રહેણાક વિસ્તારમાં ઓફિસ શરૂ કરવા માટે શું મંજૂરી લેવામાં આવી હતી. શું વિજળી અને પાણીનું બિલ કોમર્શિયલ રેટ પર ભરવામાં આવી રહ્યું હતું?

કંગના વિરુદ્ધ FIR, મુખ્યમંત્રીના અપમાનનો આરોપ
આ દરમિયાન કંગના વિરુદ્ધ મુંબઈના વિક્રોલી પોલીસ સ્ટેશનમાં એફઆરઆઈ દાખલ કરવામાં આવી છે. આરોપ છે કે કંગનાએ મહારાષ્ટ્રના મુખ્યમંત્રી ઉદ્ધવ ઠાકરે વિશે અપમાનજનક ભાષાનો ઉપયોગ કર્યો હતો. ફરિયાદમાં કંગનાની ટ્વિટ્સ પણ રજૂ કરવામાં આવી છે. ફરિયાદમાં કંગનાના વિડીયોનો ઉલ્લેખ કરવામાં આવ્યો છે.