ટોપ બોલિવૂડ એક્ટ્રેસીસને NCBનું તેડું, કંગનાએ કહ્યું-'પહેલીવાર પશ્ચાતાપ થતો હશે'

નાર્કોટિક્સ કંટ્રોલ બ્યુરો (એનસીબી)એ ડ્રગ્સ મામલે દીપિકા પાદુકોણ, સારા અલી ખાન, શ્રદ્ધા કપૂર, રકુલ પ્રીત સિંહ અને સિમોન ખંભાતા જેવા બોલિવૂડના મોટા નામને સમન મોકલ્યું છે. આગામી 3 દિવસમાં બધાને પૂછપરછ માટે બોલાવવામાં આવ્યા છે. હવે આ મામલે કંગના રનૌતની પ્રતિક્રિયા આવી છે. જે લાંબા સમયથી સુશાંત સિંહ રાજપૂત માટે ન્યાયની માંગણી કરી રહી છે.

કંગનાએ ટ્વીટ કર્યું કે,'આખરે પહેલીવાર, બોલિવૂડ માફિયા એવું ઈચ્છી રહ્યાં છે કે સુશાંતને માર્યો ન ગયો હોય. તેમને પહેલીવાર પોતાની ક્રૂરતા, પોતાની ચૂપકિદી પર પશ્ચાતાપ થઈ રહ્યો છે. પહેલીવાર તેઓ ઈચ્છી રહ્યાં છે કે કાશ, તેઓ સમયને પાછળ લઈ જઈ શકે.'


કંગનાને મળી રહી હતી ધમકીઓ
નોંધનીય છે કે, કંગના છેલ્લા ઘણા સમયથી ચર્ચામાં છે. તાજેતરમાં જ તેણે મુંબઈની સરખામણી પીઓકે સાથે કરી હતી. ત્યારબાદ તેના નિવેદનની ભારે ટીકા થઈ હતી. કંગનાએ એમ પણ કહ્યું હતું કે તેને ઘણી ધમકીઓ મળી રહી છે. તેને ધ્યાનમાં રાખીને કેન્દ્ર સરકારે તેને વાય કેટેગરીની સુરક્ષા પૂરી પાડી હતી. બીજી બાજુ, બીએમસીએ મુંબઈમાં કંગનાની ઓફિસમાં એવું કહીને બુલડોઝર ફેરવી દીધું કે, ઘણી જગ્યાએ ગેરકાયદેસર બાંધકામો થયેલા છે. જે પછી આ સમગ્ર મામલો કોર્ટમાં પહોંચ્યો હતો.

દીપિકાએ ચેટમાં શું વાત કરી?
જો વાત કરવામાં આવે દીપિકાની તો એનસીબીને મળેલી ડ્રગ ચેટમાં D એટલે કે દીપિકા પાદુકોણ જે K પાસેથી 'માલ' એટલે કે ડ્રગ્સની વાત કરી રહી છે. તે કરિશ્મા પ્રકાશ છે. જે KWAN ટેલેન્ટ મેનેજમેન્ટ એજન્સીની કર્મચારી છે. દીપિકાના સવાલ પર કરિશ્મા કહે છે કે,'મારી પાસે છે પરંતુ ઘરે છે. હું બાંદ્રામાં છું.' કરિશ્માએ આગળ જણાવ્યું હતું કે, 'કહે તો હું અમિતને પૂછી શકું છું.' જેના પર દીપિકાનો જવાબ આવ્યો હતો કે,'હા, પ્લીઝ' કરિશ્માએ કહ્યું કે,'અમિત પાસે છે, તે લઈ જઈ રહ્યો છે.' જેના પર દીપિકાએ કહ્યું હતું કે, 'Hash ને? વીડ નહીં '

રિયાએ લીધા હતા 25 બોલિવૂડ સેલેબના નામ
નોંધનીય છે કે જ્યારે સુશાંતના મોત મામલે રિયા ચક્રવર્તીની પૂછપરછ કરવામાં આવી ત્યારે તેણે ડ્રગ્સની વાત કબૂલ કરી હતી. પૂછપરછ દરમિયાન તેમણે બોલિવૂડની 25 મોટી હસ્તીઓના નામ આપ્યા હતા.જે ડ્રગ્સનો ઉપયોગ કરે છે. આ પછી રિયાની ધરપકડ કરી જેલહવાલે કરવામાં આવી હતી. જે પછી જયા સાહા સહિતના ડ્રગ પેડલર્સની પૂછપરછ કરવામાં આવી. જેમાં ઘણા મોટા બોલીવુડ સેલેબ્સ ડ્રગ લેતા હોવાનું બહાર આવ્યું છે. જેમાં સારા અલી ખાન, રકુલ પ્રીત સિંહ અને શ્રદ્ધા કપૂર જેવી ટોચની અભિનેત્રીઓનો પણ સમાવેશ થાય છે.