NCBએ કરણ જોહરને ફટકારી નોટિસ, ઘરે યોજાયેલી પાર્ટીની માંગી વિગતો

બોલીવૂડ ફિલ્મ મેકર કરણ જોહરને ઘરે યોજાયેલી પાર્ટીના વાઈરલ વિડીયોને લઈને નાર્કોટિક્સ કંટ્રોલ બ્યૂરો (એનસીબી)એ તેને નોટિસ ફટકારી છે. મુંબઈ એનસીબી એ કરણ જોહરને આ સંદર્ભમાં નોટિક પાઠવી છે. એનસીબી એ કરણ જોહરને બી-ટાઉન સેલેબ્સ માટે યોજાયેલી પાર્ટીની વિગતો માંગી છે. નોંધનીય છે કે અકાલી દળના નેતા મનજિંદર સિંહ સિરસાએ પાર્ટીને લઈને એનસીબીને ફરિયાદ કરી હતી.

કરણ જોહરે 2019મા યોજાયેલી પાર્ટીની તમામ વિગતો આપવાની છે. જેમાં આ પાર્ટીમાં કોણ કોણ સામેલ હતું, કયા કેમેરાથી વિડીયો શૂટ કરવામાં આવ્યો છે, શું કોઈ ઈન્વિટેશન કાર્ડ મોકલવામાં આવ્યું હતું. કરણ જોહરને આ તમામ જાણકારી શુક્રવારે એટલે કે 18 ડિસેમ્બર સુધી આપવાનું કહેવામાં આવ્યું છે. જોકે, હાલમાં કોઈને પૂછપરછ માટે સમન મોકલામાં આવ્યું નથી. નોટિસમાં જોહરને હાજર રહેવા માટે કહેવામાં આવ્યું નથી.

આ વિડીયો અંગે કરણ જોહરે સત્તાવાર નિવેદન જારી કર્યું હતું. તેણે જાણકારી આપી હતી કે વર્ષ 2019ની હાઉસ પાર્ટીમાં ડ્રગ્સનો ઉપયોગ કર્યો ન હતો. કરણ જોહરે લખ્યું હતું કે, તે પોતે ડ્રગ્સ લેતો નથી અને તેને પ્રોત્સાહન પણ આપતો નથી. તેની પાર્ટીમાં દીપિકા પાદુકોણ, મલાઈકા અરોરા, અર્જુન કપૂર, શાહિદ કપૂર, રણબીર કપૂર, વરૂણ ધવન, વિકી કૌશલ સહિત ઘણા સ્ટાર્સ હાજર રહ્યા હતા.

થોડા દિવસ અગાઉ અકાલી દળના નેતા મનજિંદર સિંહ સિરસાએ દાવો કર્યો હતો કે એનસીબી ટૂંક સમયમાં કરણ જોહરને સમન પાઠવશે. મનજિંદર સિંહ સિરસાએ કરણ જોહરની આ પાર્ટીની ફરિયાદ એનસીબી વડા રાકેશ અસ્થાનાને કરી હતી અને પૂરાવા તરીકે વિડીયો આપ્યો હતો.