બર્થ ડે પર યશ-રૂહીએ પપ્પાની મજા લીધી, કરણ જોહરની આ બાબતથી થાક્યા હોવાનું કહ્યું

કરણ જોહરના ટ્વિન્સ બાળકો યશ અને રૂહી જોહરનો આજે જન્મદિવસ છે. ટ્વિન્સના બર્થ ડે પર કરણ જોહરે તેમનો ખાસ વિડીયો શેર કર્યો છે. વિડીયોમાં યશ અને રૂહી પપ્પાની મશ્કરી કરતાં જોવા મળે છે. યશ અને રૂહીએ કરણ જોહરના કપડાંને 'ગંદા અને ચળકતા' કહ્યા છે. યશ-રૂહીની નાદાનીથી ભરેલો આ વિડીયો જોઈને તમને મજા પડી જશે!


કરણ જોહરે વિડીયો શેર કરતાં લખ્યું, 'બર્થ ડે ટુડલ્સ જરૂરી છે! ફેશન ક્રિટિક્સ મારી ફીરકી લેવા માટે આવી ગયા છે! મારી જિંદગીના પ્રેમને હેપી બર્થ ડે!' વિડીયોમાં જોઈ શકો છો કે યશ અને રૂહી કરણ જોહરના ક્લોસેટમાં છે. અહીં કરણના વિવિધ કપડાં અને બેગ્સ જોઈ શકાય છે. વિડીયોમાં કરણ યશ-રૂહીને હેપી બર્થ ડે કહે છે ત્યારે બંને થાકી ગયા હોવાનું કહે છે. આ બંને બાળકોના થાકવાનું કારણ તેમના પપ્પાના ચળકતા અને ગંદા કપડાં છે. ત્યારે કરણ રૂહીને કહે છે કે તેણે પહેરેલું સિલ્વર શોર્ટ્સ પણ ચળકે છે. જો રૂહી પહેરી શકે તો પપ્પા કેમ નહીં? વિડીયોના અંતે કરણ બંને બાળકોને કહે છે કે લોકો તેમને બર્થ ડેની શુભકામના પાઠવી રહ્યા છે તો લવ યુ કહી દો.


કરણ જોહરે શેર કરેલા આ વિડીયો પર વિવિધ સેલેબ્સ કોમેન્ટ કરીને યશ-રૂહીને બર્થ ડેની શુભેચ્છા આપી રહ્યા છે. મલાઈકા અરોરા, અમૃતા અરોરા, સુઝેન ખાન, કાજોલ, બિપાશા બાસુ, ટ્વિન્કલ ખન્ના, ઈશાન ખટ્ટર, મનીષ મલ્હોત્રા, મહીપ કપૂર, સીમા ખાન, સોફી ચૌધરી સહિત ઘણા સેલેબ્સ બર્થ ડે ટ્વિન્સ પર શુભેચ્છાઓનો વરસાદ કરી રહ્યા છે.


આ ઉપરાંત કરીના કપૂર ખાને પણ ઈન્સ્ટાગ્રામ સ્ટોરીમાં તૈમૂર અને યશ-રૂહીની તસવીર શેર કરીને ભાઈ-બહેનની જોડીને બર્થ ડેની શુભકામના પાઠવી હતી.

જણાવી દઈએ કે, લોકડાઉનના શરૂઆતના દિવસોમાં કરણ જોહર યશ અને રૂહીના ઘણા વિડીયો શેર કરતો હતો. જેમાં બંને બાળકોની આ પ્રકારની નિર્દોષ મસ્તી જોવા મળતી હતી. કરણે આ વિડીયોને 'લોકડાઉન વિથ જોહર્સ' નામ આપ્યું હતું. ઉલ્લેખનીય છે કે, ફિલ્મમેકર કરણ જોહરે બંને બાળકોના નામ પોતાના માતાપિતાના નામ પરથી રાખ્યા છે. દીકરાનું નામ પિતા યશ જોહરના નામ પરથી અને દીકરીનું નામ મમ્મી હીરૂ જોહરના નામ પરથી પાડ્યું છે.