ધર્મશાલામાં પતિ અને દીકરા સાથે દિવાળી ઉજવી રહીછે કરીના, BFF મલાઈકા પણ છે સાથે

કોરોના મહામારી ચાલી રહી છે એવામાં આ વર્ષે તહેવારો પણ સાદગીથી ઉજવાઈ રહ્યા છે. દર વખતે બોલિવુડ સેલેબ્સ એકબીજા સાથે મળીને ધામધૂમથી દિવાળીની ઉજવણી કરતાં હતા. પરંતુ આ વખતે મોટાભાગના સેલેબ્સ પોતાના પરિવાર સાથે ઘરે રહીને જ તહેવાર ઉજવી રહ્યા છે. બોલિવુડની ડીવા કરીના કપૂર ખાન દિવાળી મનાવવા માટે ધર્મશાલા પહોંચી ગઈ છે. સૈફ અલી ખાન ફિલ્મના શૂટિંગ માટે ધર્મશાલામાં છે ત્યારે કરીના પણ ત્યાં પહોંચી છે. કરીના ઉપરાંત તેની બેસ્ટફ્રેન્ડ મલાઈકા અરોરા પણ ધર્મશાલામાં હાજર છે.

સૈફ અલી ખાન, અર્જુન કપૂર, જેક્લીન ફર્નાન્ડિઝ અને યામી ગૌતમ આગામી ફિલ્મના શૂટિંગ માટે ધર્મશાલામાં છે. ત્યારે પોતાના બોયફ્રેન્ડ અર્જુન કપૂર સાથે તહેવારની ઉજવણી કરવા મલાઈકા પણ ત્યાં પહોંચી છે. ધર્મશાલામાં મલાઈકા અને કરીના દિવાળીના પર્વને ઉજવી રહ્યા છે. સોશિયલ મીડિયા પર એક્ટિવ રહેતી મલાઈકા અરોરાએ ઈન્સ્ટાગ્રામ સ્ટોરીમાં દિવાળીના પર્વની હૂંફભરી સાંજની તસવીર શેર કરી હતી.


મલાઈકાએ જેક્લીન ફર્નાન્ડિઝ અને સૈફ અલી ખાન સાથે તસવીર શેર કરી છે. મલાઈકા શિમરી ડ્રેસમાં જોવા મળી રહી છે જ્યારે સૈફ અલી ખાન બ્લેક કૂર્તામાં દેખાય છે. જેક્લીન બ્લેક ડ્રેસમાં ખૂબસૂરત લાગતી હતી. આ તસવીર શેર કરતાં મલાઈકાએ લખ્યું, "હેપી દિવાલી."


પતિ સાથે દિવાળી મનાવવા ધર્મશાલા પહોંચેલી કરીનાએ પણ દિવાળી પર એક બૂમરેંગ વિડીયો શેર કરીને સૌને શુભેચ્છા પાઠવી છે. વિડીયોમાં જોઈ શકાય છે કે, પ્રેગ્નેન્ટ કરીના કપૂર ખાન સિમ્પલ ડ્રેસમાં જોવા મળે છે. તો નાનકડા તૈમૂરે વ્હાઈટ કૂર્તો અને સૈફે બ્લેક કૂર્તો પહેર્યો છે. સૈફ અને તૈમૂર કંઈક વાત કરી રહ્યા છે જ્યારે કરીના કેમેરા સામે પોઝ આપી રહી છે. આ વિડીયો શેર કરતાં કરીનાએ લખ્યું, "સૌને દિવાળીની શુભેચ્છાઓ. સુરક્ષિત રહો. ખુશ રહો." કરીનાની આ પોસ્ટ પર તેની કાકાની દીકરી રિદ્ધિમા કપૂરે કોમેન્ટ કરી છે. રિદ્ધિમાએ કોમેન્ટમાં હાર્ટનું ઈમોજી મૂક્યું છે.


આ ઉપરાંત કરીનાએ પોતાની ઈન્સ્ટાગ્રામ સ્ટોરીમાં બેસ્ટફ્રેન્ડ મલાઈકા સાથેની તસવીર શેર કરી છે. વ્હાઈટ ડ્રેસ અને મરુન દુપટ્ટા સાથે બેબો સુંદર લાગી રહી છે. આ તસવીર શેર કરતાં કરીનાએ લખ્યું, "ધર્મશાલાની દિવાળી."

ઉલ્લેખનીય છે કે, કરીના કપૂર બીજીવાર પ્રેગ્નેન્ટ છે અને 2021માં સૈફ-કરીનાના બીજા બાળકનો જન્મ થશે. પહેલી પ્રેગ્નેન્સીની જેમ આ વખતે પણ કરીનાએ કામ ચાલુ રાખ્યું છે. ધર્મશાલા આવતા પહેલા કરીનાએ પોતાના રેડિયો શોનું શૂટિંગ કર્યું હતું.