કરીનાને યાદ આવ્યા ડેટિંગના દિવસો, શેર કરી 'સૈફુ' સાથેની જૂની તસવીર

સૈફ અલી ખાન અને કરીના કપૂર ફેન્સને રિલેશનશિપ ગોલ્સ આપવામાં ક્યારેય નિષ્ફળ રહ્યા નથી. તેઓ બોલિવુડના મોસ્ટ લવ્ડ કપલમાંથી એક છે. લોકો તેમને 'સૈફીના' કહીને પણ બોલાવે છે. બંનેની ફેન ફોલોઈંગ પણ ઘણી વધારે છે.

આ વર્ષી શરુઆતમાં ઈન્સ્ટાગ્રામ પર ડેબ્યૂ કરનારી કરીના સૈફ તેમજ લિટલ મંચકિન તૈમૂર સાથેની તસવીરો શેર કરી રહે છે. આજે તેણે ઈન્સ્ટાગ્રામ પર સૈફ સાથેની થ્રોબેક તસવીર શેર કરી છે. જે 2008માં ક્લિક કરવામાં આવી હતી. આ તસવીર તે વખતની છે જ્યારે તેઓ ડેટ કરી રહ્યા હતા.


તસવીરમાં બંને એકબીજાના બાહુપાશમાં જોવા મળી રહ્યા છે. ફેન્સ સાથે આ તસવીર શેર કરતાં કરીનાએ લખ્યું છે કે, 'હું અને મારો પ્રેમ એક્રોપોલીસ પાસે ❤️ એથેન્સ 2008 ❤️'.


બેબો અને સૈફે વર્ષ 2012માં લગ્ન કર્યા હતા. હાલમાં તેમણે 8મી એનિવર્સરી સેલિબ્રેટ કરી હતી. આ દિવસે કરીનાએ ઈન્સ્ટાગ્રામ પર પતિ સાથેની એક ખાસ તસવીર શેર કરી હતી અને સુખી લગ્નજીવનનું રહસ્ય પણ જણાવ્યું હતું. કરીનાએ લખ્યું હતું કે, 'એક સમયની વાત છે બેબો નામની એક છોકરી અને સૈફુ નામનો એક છોકરો હતો. બંનેને સ્પગેટી અને વાઈન ખૂબ પસંદ હતા...અને પછી તેઓ હંમેશા ખુશહાલ જીવન જીવવા લાગ્યા. હવે તમને બધાને સુખી લગ્નજીવનની ચાવી મળી ગઈ છે. આ વાતે હેપી એનિવર્સરી SAKP...અનંતકાળ અને તેનાથી પણ વધુ સુધી'.

ઉલ્લેખનીય છે કે, સૈફ અને કરીના બીજી વખત માતા-પિતા બનવા જઈ રહ્યા છે. તેમના બીજા બાળકનો જન્મ 2021માં થવાનો છે. થોડા સમય પહેલા તેમણે બીજી પ્રેગ્નેન્સીની જાહેરાત કરી હતી. બીજી પ્રેગ્નેન્સીની લઈને સૈફની પ્રતિક્રિયા શું હતી તે અંગે કરીનાએ હાલમાં એક ઈન્ટરવ્યૂમાં વાત કરી હતી. કરીનાએ કહ્યું હતું કે, 'બીજી પ્રેગ્નેન્સી વિશે જણાવ્યું ત્યારે પરિવાર તરફથી કોઈ ફિલ્મી રિએક્શન નહોતું આવ્યું. આ વાત જાણીને સૈફની પ્રતિક્રિયા પણ સામાન્ય જ હતી. આ ન્યૂઝ સાંભળીને સૈફ ખુશ થયો હતો'.

પ્રેગ્નેન્સી વિશે વાત કરતાં કરીનાએ આગળ કહ્યું હતું કે, 'આ માટે કંઈ જ પ્લાનિંગ નહોતું કર્યું પરંતુ આ ખુશી એવી હતી જે બધા સાથે મળીને સેલિબ્રેટ કરવા માગતા હતા.' ઉલ્લેખનીય છે કે, ઓગસ્ટ મહિનામાં કરીના અને સૈફે એક નિવેદન આપીને જણાવ્યું હતું, 'અમને જણાવતાં આનંદ થઈ રહ્યો છે કે અમારો પરિવાર મોટો થવા જઈ રહ્યો છે. તમારા શુભેચ્છાઓ, પ્રેમ અને સહકાર માટે આભાર'.