કરીનાએ આટોપ્યું 'લાલ સિંહ ચઢ્ઢા'નું શૂટિંગ, જણાવ્યું-કેવી મુશ્કેલ સ્થિતિમાં કર્યું કામ

મેટરનિટી લીવ પર જતા પહેલા કરીના કપૂર પોતાનું તમામ કામ આટોપી લેવામાં લાગી છે. તેણે આમિર ખાન સાથેની અપકમિંગ ફિલ્મ 'લાલ સિંહ ચઢ્ઢા'નું શૂટિંગ આટોપી લીધું છે. આ વાતની જાણકારી એક્ટ્રેસે સોશિયલ મીડિયા પર આપી છે. તેણે શૂટિંગ ખતમ કર્યા બાદ સેટ પરની એક તસવીર પણ શેર કરી છે.


તસવીર શેર કરતાંની સાથે તેણે લખ્યું છે કે, 'દરેક સફરનો અંત હોય છે. આજે મેં ફિલ્મ લાલ સિંહ ચઢ્ઢાનું શૂટિંગ ખતમ કરી લીધું છે. મુશ્કેલ સમય, મહામારી, મારી પ્રેગ્નેન્સી, નર્વસનેસ...પરંતુ તમામ બાબતો અમારા ઉત્સાહને રોકી શકી નહીં. જે અમે સેફ્ટીની સાથે-સાથે શૂટ કર્યું'.

આ સાથે કરીનાએ આમિર ખાન અને ફિલ્મની ટીમનો પણ આભાર માન્યો છે. રિપોર્ટ્સ પ્રમાણે, કરીનાની પ્રેગ્નેન્સીને ધ્યાનમાં રાખીને શૂટિંગ દરમિયાન ખાસ સાવચેતી અને કોવિડની ગાઈડલાઈન્સનું પાલન કરવામાં આવ્યું હતું. ગયા વર્ષે આમિરે ફિલ્મમાંથી કરીનાનો ફર્સ્ટ લૂક રિલીઝ કર્યો હતો, જેમાં તે સુંદર લાગી રહી હતી.


કરીના કપૂર બીજા બાળકને આવકારવા માટે આતુર છે. તેણે હાલમાં તૈમૂર ક્રિકેટ રમી રમ્યો હોય તેવી તસવીર શેર કરી હતી. જેના પર ફેન્સે ખૂબ પ્રેમ વરસાવ્યો હતો. આ તસવીરે પ્રિયંકા ચોપરાનું પણ ધ્યાન ખેંચ્યુ હતું અને તેણે પણ ક્યૂટ કોમેન્ટ કરી હતી.

તૈમૂર માત્ર કરીનાનો લાડકો જ નથી, તે પાપારાઝીનો પણ ફેવરિટ છે. પાપારાઝી હંમેશા તૈમૂરની ઝલક મેળવવા માટે પડાપડી કરે છે. સૈફે હાલમાં આપેલા એક ઈન્ટરવ્યૂમાં જણાવ્યું હતું કે, 'આજકાલ તૈમૂર રામાયણ જોવે છે. રામાયણ તૈમૂરને ખૂબ પસંદ છે. તેને લાગે છે કે તે ભગવાન શ્રીરામ છે. આ ઉપરાંત તૈમૂરને કિંગ આર્થર અને તલવારો વિશે સાંભળવાનું ગમે છે. હું અને કરીના તેને આ વિશે વાંચી સંભળાવીએ છીએ'.

વર્કફ્રંટની વાત કરીએ તો, કરીના કરણ જોહરની મલ્ટી-સ્ટારર ફિલ્મ 'તખ્ત'માં જોવા મળશે. પીરિયડ ડ્રામા ફિલ્મમાં કરીના સિવાય રણવીર સિંહ, વિકી કૌશલ, આલિયા ભટ્ટ, જાહ્નવી કપૂર, ભૂમિ પેડનેકર અને અનિલ કપૂર પણ છે.