દીપિકા પાદુકોણની મેનેજર કરિશ્મા પ્રકાશના ઘરે NCBની તપાસ, મળી આવ્યું ડ્રગ્સ

ડ્રગ્સ કનેક્શનને લઈને નારકોટિક્સ કંટ્રોલ બ્યૂરો (NCB)ની ટીમે મુંબઈમાં એક્ટ્રેસ દીપિકા પાદુકોણની મેનેજર કરિશ્મા પ્રકાશના ઘરે સર્ચ કર્યું હતું. જ્યાંથી NCBને ડ્રગ્સ મળી આવ્યું છે. NCBની ટીમે કરિશ્મા પ્રકાશને સમન મોકલીને મંગળવારે હાજર થવા માટે જણાવ્યું હતું પણ તે હાજર થઈ નહોતી. NCBની ટીમને એક ડ્રગ પેડલરની સાથે તેનું કનેક્શન મળી આવ્યું છે.

આ પહેલા પણ NCBની ટીમે કરિશ્મા પ્રકાશની બે વખત પૂછપરછ કરી હતી. એક વખત દીપિકા પાદુકોણની સામે બેસાડીને તેની પૂછપરછ કરવામાં આવી હતી. કારણકે, તેઓ બંને વચ્ચે થયેલી ડ્રગ્સ સંબંધિત વાત વિશે જાણવા મળ્યું હતું.

અહીં નોંધનીય છે કે દીપિકા પાદુકોણે NCBને જણાવ્યું હતું કે તે માલ શબ્દનો ઉપયોગ એક ખાસ પ્રકારની સિગારેટ માટે કરે છે. તે જાડી સિગારેટ અને નાની સિગારેટ માટે પણ ખાસ કોડ ભાષાનો ઉપયોગ કરે છે.

દીપિકા પાદુકોણના મેનેજર તરીકે કામ કરતી કરિશ્મા પ્રકાશ 'ક્વાન' નામની એક સેલેબ્રિટી મેનેજમેન્ટ કંપનીમાં કામ કરે છે. આ કંપની 40 કરતા વધારે બોલિવૂડ સેલેબ્સને ટેલેન્જ મેનેજરની વ્યવસ્થા કરી આપે છે. રિયા ચક્રવર્તીની મેનેજર જયા સહા પણ આ કંપની માટે કામ કરતી હતી.