KBC 14ના સેટ પર થઈ દુર્ઘટના! અમિતાભ બચ્ચનના પગની નસ કપાઈ ગઈ, તાત્કાલિક હોસ્પિટલ લઈ જવાયા

અમિતાભ બચ્ચન સાથે તાજેતરમાં જ કૌન બનેગા કરોડપતિ 14ના સેટ પર એક દુર્ઘટના બની છે. અમિતાભ બચ્ચનના ડાબા પગની એક નસ કપાઈ ગઈ છે, જેના કારણે તેમને તાત્કાલિક હોસ્પિટલ લઈ જવામાં આવ્યા હતા. તેમને પગમાં ટાંકા લગાવવામાં આવ્યા છે. અમિતાભે બચ્ચને પોતે આ ઘટનાની જાણકારી આપી છે. તેણે પોતાના બ્લોગમાં સમગ્ર વાત જણાવી હતી. બિગ બીએ જણાવ્યું કે, લોહી રોકાઈ નહોતુ રહ્યું. ડોક્ટરોએ જેમ તેમ કરીને તે રોક્યું અને ટાંકા લીધા હતા.

અમિતાભ બચ્ચને લખ્યું કે, જૂતામાં એક મેટલનો ટુકડો હોવાને કારણે મારા ડાબા પગની નસ કપાઈ ગઈ હતી. જ્યારે લોહી નીકળવા લાગ્યું તો સ્ટાફ અને મેડિકલ ટીમે મારી મદદ કરી હતી. સમય પર સારવાર મળી હોવાને કારણે સ્થિતિ નિયંત્રણમાં આવી ગઈ જો કે થોડા ટાંકા લેવામાં આવ્યા છે. ઉલ્લેખનીય છે કે અમિતાભ બચ્ચન બ્લોગમાં પોતાની સાથે થનારા કિસ્સાઓ શેર કરતા રહે છે.


અમિતાભ બચ્ચનના પગની નસ કપાઈ જતા સેટ પર હલચલ મચી ગઈ હતી. તેમને તાત્કાલિક હોસ્પિટલ લઈ જવામાં આવ્યા. ડોક્ટરોએ તેમના પગમાં ટાંકા લીધા હતા. અત્યારે અમિતાભ બચ્ચનને આરામ કરવાની સલાહ આપવામાં આવી છે. તેમને ચાલતી વખતે પણ પગ પર વધારે દબાણ આપવાની ના પાડી છે. આ સિવાય ટ્રેડમિલ પર ચાલવાની પણ ના પાડી છે. અમિતાભ બચ્ચને ઈન્સ્ટાગ્રામ અકાઉન્ટ પર તસવીરો પણ શેર કરી હતી.

પ્રોફેશનલ ફ્રંટની વાત કરીએ તો, અમિતાભ બચ્ચનની ફિલ્મ ગુડબાય તાજેતરમાં જ રીલિઝ થઈ હતી. હવે તે સૂરજ બડજાત્યાની ફિલ્મ ઉંચાઈમાં જોવા મળશે. ગુડબાય પહેલા તે અયાન મુખર્જીની ફિલ્મ બ્રહ્માસ્ત્રમાં જોવા મળ્યા હતા. આ સિવાય તેમની પાસે પ્રોજેક્ટ કે, બટરફ્લાય, ગણપત, ઘૂમર અને ધ ઉમેશ ક્રોનિકલ્સ નામની ફિલ્મો પણ છે. આ સિવાય તે કૌન બનેગા કરોડપતિ પણ હોસ્ટ કરે છે. કૌન બનેગા કરોડપતિની અત્યારે 14મી સિઝન ચાલી રહી છે. ઈજાગ્રસ્ત થયા હોવા છતા તે સેટ પર પહોંચ્યા હતા અને આગામી એપિસોડ માટે શૂટિંગ કર્યુ હતું.