સુશાંત સિંહ રાજપૂતના પિતા હોસ્પિટલમાં દાખલ, ફેન્સે ઝડપી રિકવરી માટે કરી પ્રાર્થના

દિવંગત એક્ટર સુશાંત સિંહ રાજપૂતના પિતા કે.કે. સિંહની તસવીર સોશિયલ મીડિયા પર ખૂબ વાયરલ થઈ રહી છે. તસવીરમાં કે. કે. સિંહ હોસ્પિટલના બિછાને જોવા મળી રહ્યા છે. તેમની સાથે દીકરીઓ જોવા મળી રહી છે. મીડિયામાં ફરી રહેલા અહેવાલો પ્રમાણે, કે. કે. સિંહ હરિયાણાના ફરીદાબાદની એક હોસ્પિટલમાં દાખલ છે. કે. કે. સિંહની આ તસવીર @soumyadipta દ્વારા ટ્વિટર પર શેર કરવામાં આવી છે, જે હાલ સોશિયલ મીડિયામાં ખૂબ વાયરલ થઈ રહી છે.


સોમ્ય દીપ્તાની પોસ્ટ મુજબ, કે. કે. સિંહને હૃદય સંબંધિત કોઈ બીમારી થઈ હતી જે બાદ દાખલ કરાયા છે. સોમ્યએ તસવીર શેર કરતાં લખ્યું છે, "પટણામાં નોંધાયેલી FIRના આધારે CBIની તપાસ ચાલી રહી છે અને તેના મુખ્ય ફરિયાદી સુશાંતના પિતા છે. હાલ તેઓ હોસ્પિટલમાં દાખલ છે અને તેમને હૃદયની બીમારી થઈ છે. સ્ટ્રેસ તેમના પર ભારે પડી રહ્યો છે. CBIએ આ વડીલ માટે થઈને પોતાનો નિર્ણય સંભળાવી દેવો જોઈએ."

14 ડિસેમ્બરે સુશાંત સિંહ રાજપૂતના અપમૃત્યુના 6 મહિના પૂરા થયા છે. 14 જૂને સુશાંત સિંહ રાજપૂત બાંદ્રા સ્થિત ઘરે મૃત હાલતમાં મળી આવ્યો હતો. પહેલા સુશાંતની મોત આત્મહત્યાને લીધે થઈ હોવાનું કહેવાયું હતું પરંતુ બાદમાં કેસ મુંબઈ પોલીસના હાથમાંથી લઈને CBIને સોંપાયો હતો. એનફોર્સમેન્ટ ડિરેક્ટોરેટ (ED) અને નાર્કોટિક્સ કંટ્રોલ બ્યૂરો (NCB) પણ સુશાંતના મોતનું કારણ જાણવા તપાસ ચલાવી રહ્યા છે. જો કે, કેંદ્રીય એજન્સીઓ હજી કોઈ નિષ્કર્ષ પર નથી પહોંચી, તેમના સત્તાવાર નિવેદનની રાહ જોવાઈ રહી છે.

આ તરફ સુશાંત સિંહ રાજપૂતના ફેન્સ કે. કે. સિંહની આ તસવીર શેર કરીને તેઓ ઝડપથી સાજા થાય તે માટે પ્રાર્થના કરી રહ્યા છે. તો કેટલાક ફેન્સે હજી પણ સુશાંત માટે ન્યાય માગવાનું ચાલુ રાખ્યું છે અને તેઓ CBIને પોતાનો નિર્ણય જલદી સંભળાવવાની વિનંતી કરી રહ્યા છે. જો કે, ન્યૂઝ લખાયા ત્યાં સુધીમાં સુશાંતના પરિવાર તરફથી કે. કે. સિંહની તબિયત કે આ વાયરલ તસવીર વિશે કોઈ પ્રતિક્રિયા આપવામાં આવી નથી. જુઓ ફેન્સના કેટલાક ટ્વિટ: