'ધરપકડ માટે તૈયાર છે રિયા ચક્રવર્તી, પ્રેમ કરવો ગુનો હોય તો પરિણામ પણ ભોગવીશું'

સુશાંત સિંહ રાજપૂતના મોત મામલે ડ્રગ્સ એંગલ સામે આવ્યા પછી નાર્કોટિક્સ કંટ્રોલ બ્યૂરો પણ તપાસ કરી રહ્યું છે. રવિવારે સવારે NCBના સમન્સ બાદ રિયા ચક્રવર્તીની પૂછપરછ થઈ રહી છે. આ મામલે NCBએ રિયાના ભાઈ શોવિક ચક્રવર્તીની શુક્રવારે ધરપકડ કરી હતી. આ ઉપરાંત સુશાંતના હાઉસ મેનેજર સેમ્યુઅલ મિરાન્ડા અને હાઉસ હેલ્પ દીપેશ સાવંતની પણ ધરપકડ કરી છે. આ ત્રણેયના 9 સપ્ટેમ્બર સુધીના રિમાન્ડ મળ્યા છે. ત્યારે માનવામાં આવી રહ્યું છે કે, પૂછપરછ બાદ રિયાની પણ ધરપકડ થઈ શકે છે. આ મામલે રિયાના વકીલ સતીશ માનેશિંદેની પ્રતિક્રિયા આવી છે.

સુશાંત કેસમાં રિયા અને તેના પરિવાર તરફથી કેસ લડી રહેલા સતીશ માનેશિંદેએ કહ્યું કે, રિયા ધરપકડ માટે તૈયાર છે. મીડિયા રિપોર્ટ મુજબ, સતીશ માનેશિંદેએ કહ્યું, "રિયા ચક્રવર્તી ધરપકડ માટે તૈયાર છે કારણકે તે લોકોના નિશાના પર છે. જો કોઈને પ્રેમ કરવો ગુનો હોય તો રિયા તેના પ્રેમનું પરિણામ ભોગવવા પણ તૈયાર છે. બિહાર પોલીસ, CBI, ED અને NCBએ તેની સામે વિવિધ ગુના દાખલ કર્યા પરંતુ નિર્દોષ હોવાથી તેણે કોર્ટમાં આગોતરા જામીનની માગ કરી નથી."


મહત્વનું છે કે, આજે સવારે 10.30 કલાકે NCBએ રિયાને હાજર થવા માટે સમન્સ પાઠવ્યું હતું. પરંતુ રિયા સમયસર ત્યાં પહોંચી નહોતી અને હવે માનેશિંદેના નિવેદન બાદ એવું લાગી રહ્યું છે કે, રિયા અને તેના પરિવારને અંદેશો છે કે, ધરપકડથી બચી શકાશે નહીં. માનવામાં આવી રહ્યું છે કે, આજે રિયા, શોવિક, સેમ્યુઅલ અને દીપેશને સામસામે બેસાડીને પૂછપરછ થઈ શકે છે.