મહિલાઓ અંગે આપેલા નિવેદન પર 'શક્તિમાન' મુકેશ ખન્નાએ કરી સ્પષ્ટતા

'શક્તિમાન' એક્ટર મુકેશ ખન્ના હાલ પોતાના નિવેદનના કારણે ચર્ચામાં છે. તાજેતરમાં જ તેમનો એક વિડીયો વાયરલ થયો હતો, જેમાં તેમણે કથિત રીતે મહિલાઓ અંગે આપત્તિજનક નિવેદન આપ્યું હતું. હવે મુકેશ ખન્નાએ પોતાના વાયરલ વિડીયો અંગે સ્પષ્ટતા કરી છે.

'માત્ર એક જ ટૂકડો વાયરલ કરી ખોટા સાબિત ન કરી શકો'
મુકેશ ખન્નાએ સોશિયલ મીડિયા પર એક વીડિયો શેર કર્યો છે. જેમાં તેણે મીટુથી લઈને મહિલા સુરક્ષા સહિતના અનેક મુદ્દાઓ પર પોતાની વાત લોકો સમક્ષ રાખી છે. એક્ટરે સ્પષ્ટ જણાવ્યું કે, જે વીડિયો વાયરલ થયો છે તે માત્ર એક ટૂકડો જ છે અને તેના આધારે કોઈને પણ ખોટા સાબિત ન કરી શકાય. તેમણે પોતાની પોસ્ટમાં કહ્યું છે કે તેઓ મહિલાઓને ખૂબ માન આપે છે.

'મારા નિવેદનને ખોટી રીતે લેવામાં આવ્યું'
મુકેશ ખન્નાએ વિડીયો સાથે લખ્યું કે,'મને ખરેખર આશ્ચર્ય થઈ રહ્યું છે કે મારા એક નિવેદનને ખૂબ જ ખોટી રીતે લેવામાં આવ્યું છે. મને મહિલાઓ વિરુદ્ધ હોવાનું કહેવામાં આવ્યું છે. જેટલું સન્માન હું મહિલાઓને આપું છું કદાચ ભાગ્યે જ કોઈ કરતું હશે. આ કારણે જ મેં લક્ષ્મી બોમ્બ નામનો વિરોધ કર્યો. હું નારી સુરક્ષા અંગે પણ ચિંતિત છું. દરેક દુષ્કર્મ વિરુદ્ધ અવાજ ઉઠાવું છું.'


'એક ક્લિપને લઈને ઉહાપોહ શા માટે?'
મુકેશ ખન્નાએ આગળ જણાવ્યું હતું કે,'કેટલાક લોકો મારા એક ઇન્ટરવ્યૂની ક્લિપને લઈને ઉધમ મચાવી રહ્યા છે. મેં ક્યારેય કહ્યું નથી કે મહિલાઓને કામ ન કરવું જોઈએ. હું માત્ર એજ સમજાવવા જઇ રહ્યો હતો કે મીટૂની શરુઆત કેવી રીતે થાય છે. આપણા દેશમાં મહિલાઓએ દરેક ક્ષેત્રમાં પોતાનું સ્થાન બનાવ્યું છે. પછી ભલે તે સંરક્ષણમંત્રી હોય, નાણાંમંત્રી હોય, વિદેશમંત્રી હોય કે અવકાશ, દરેક જગ્યાએ મહિલાઓએ તેમનો ઝંડો ફરકાવ્યો છે. તો હું સ્ત્રી કામ કરે તેની વિરુદ્ધ કેવી રીતે હોઈ શકું? તે વિડિઓ ઇન્ટરવ્યૂમાં, હું માત્ર સ્ત્રીઓ બહાર કામ કરે તો તેને કેવી મુશ્કેલીઓ આવી શકે છે તેના પર પ્રકાશ પાડતો હતો. જેવી રીતે ઘરના બાળકો એકલા પડી જાય છે એવું બધું. હું પુરુષ અને સ્ત્રીના ધર્મ વિશે વાત કરતો હતો, જે હજારો વર્ષોથી ચાલી રહ્યાં છે.'

'મેં હંમેશા સ્ત્રીઓનું સન્માન કર્યું'
'મેં એવું નથી કહ્યું કે સ્ત્રી બહાર જાય તો મીટૂ થાય છે. મેં આ વિષય પર એક વર્ષ પહેલાં એક વિડીયો બનાવ્યો હતો. જે હું તમને બતાવવા માંગું છું. જેમાં પણ મેં કહ્યું હતું કે મહિલાઓએ તેમના કામ કરવાના સ્થળ પર કેવી રીતે આત્મરક્ષા કરવી જોઈએ. મેં હજી સુધી એવું કહ્યું નથી કે સ્ત્રીઓએ કામ પર ન જવું જોઈએ. તો હું આજે કેવી રીતે કહી શકું. હું મારા બધા મિત્રોને કહેવા માંગુ છું કે મારા નિવેદનને ખોટી રીતે રજૂઆત ન કરો.'



શૅર કરી ઈન્ટરવ્યૂની ક્લિપ
મારી છેલ્લી ચાલીસ વર્ષની ફિલ્મની સફર એ વાતને સાબિત કરે છે કે, મેં હંમેશાં મહિલાઓને માન આપ્યું છે. દરેક કલાકાર અથવા દરેક ફિલ્મના સભ્ય જાણે છે કે મેં હંમેશાં દરેકનું સન્માન કર્યું છે. જો મારા નિવેદનથી કોઈ પણ સ્ત્રીને દુઃખ થયું હોય તો હું દિલગીર છું કે હું મારી વાતને યોગ્ય રીતે મૂકી શક્યો નથી. મને એ વાતની ચિંતા નથી કે મહિલા સમાજ મારી વિરુદ્ધ જશે. મારું જીવન એક ખુલ્લું પુસ્તક છે. દરેક વ્યક્તિ જાણે છે કે હું કેવી રીતે જીવ્યો છું અને જીવી રહ્યો છું. હું તમને તે જ ઇન્ટરવ્યૂ બતાવવા માંગું છું કે જ્યાંથી આ ક્લિપિંગ લેવામાં આવી છે. હું જાણું છું કે હું મહિલાઓ વિશે શું માનું છું.'