દીપિકા પાદુકોણ, સારા અલી ખાન અને શ્રદ્ધા કપૂરના મોબાઈલ ફોન કેમ ગાંધીનગર મોકલાયા?

મુંબઈમાં એક્ટર સુશાંત સિંહ રાજપૂતના મોત મામલે તપાસ ચાલી રહી છે. નારકોટિક્સ કંટ્રોલ બ્યુરો એટલે કે NCB આ કેસમાં ડ્રગ્સ કનેક્શનની તપાસ કરી રહી છે. બોલિવૂડમાં દીપિકા પાદુકોણ, સારા અલી ખાન, અર્જુન રામપાલ, શ્રદ્ધા કપૂર સહિત સેલેબ્સના મોબાઈલ ફોન ગુજરાતના ગાંધીનગરમાં આવેલી ફોરેન્સિક લેબમાં તપાસ માટે મોકલવામાં આવ્યા છે.

ગુજરાતની Directorate of Forensic Science, ગાંધીનગરમાં NCBએ બોલિવૂડ સ્ટાર્સના 85 ગેજેટ્સ મોકલી આપ્યા છે. છેલ્લા 45 દિવસમાં મોકલી આપવામાં આવેલા ગેજેટ્સમાં 30 મોબાઈલ ફોન્સનો ડેટા નીકાળ્યા પછી NCBને પરત કરવામાં આવ્યા. બોલિવૂડ એક્ટર સુશાંતસિંહ રાજપૂતના મોતના મામલે NCB તપાસ કરી રહી છે. જેના આધારે મુંબઈમાં રેડ પાડવામાં આવી રહી છે અને લોકોની ધરપકડ પણ કરવામાં આવી રહી છે.

જે ડેટા નીકાળવામાં આવ્યો છે તેમાં ડિલિટ કરવામાં આવેલી વોઈસ ક્લિપ્સ, વિડીયો ક્લિપ્સ અને ચેટ મેસેજ તેમજ મોબાઈલ નંબર પણ છે. NCB, ફોરેન્સિક લેબમાં મુંબઈથી જપ્ત કરવામાં આવેલા ડ્રગ્સના સેમ્પ્લ પણ તપાસ માટે મોકલી રહી છે. આ ડ્રગ્સના સેમ્પલની તપાસ કરીને રિપોર્ટ તૈયાર કરવામાં આવી રહ્યો છે કે જેનાથી ડ્રગ્સ નેટવર્કની સાથે જોડાયેલા સપ્લાયર્સ અને ખરીદદારો સુધી પહોંચી શકાય. અત્યાર સુધીમાં ફોરેન્સિક લેબને 25 ડ્રગ્સના સેમ્પલ મોકલવામાં આવ્યા છે.

ફોરેન્સિક તપાસ માટે જે ગેજેટ્સ મોકલવામાં આવ્યા છે તેમાં સૌથી વધુ મોબાઈલ સેલેબ્સ અને તેમના ઓળખીતા તેમજ આરોપી ડ્રગ્સ પેડલર્સના છે. આ સિવાય 2 લેપટોપ, ટેબલેટ્સ અને પેન ડ્રાઈવ્સ પણ સામેલ છે. સૂત્રોના જણાવ્યા મુજબ જે મોબાઈલ ફોન્સ ફોરેન્સિક લેબમાં મોકલવામાં આવ્યા છે તેમાં રિયા ચક્રવર્તી અને તેનો ભાઈ શૌવિક, સારા અલી ખાન, અર્જુન રામપાલ, શ્રદ્ધા કપૂર, દીપિકા પાદુકોણ અને તે સાથે જોડાયેલા લોકોના છે.

NCBએ ગાંધીનગરની લેબથી જણાવ્યું કે એકબીજાને મોકલવામાં આવેલા મેસેજ અને ફોન વચ્ચેની લિંક પણ સ્થાપિત કરો કે જેથી ડ્રગ્સનો ઉપયોગ કરતા લોકોની ચેઈન વિશે જાણી શકાય. એવું કહેવામાં આવી રહ્યું છે કે જે ડેટા ડિલિટ કરવામાં આવ્યો છે તે ખૂબ સિક્યોર હતો, માટે ઈઝરાયલથી મંગાવવામાં આવેલા સ્પેશિયલ ઉપકરણની મદદથી આ ડેટા નીકાળવાનો પ્રયાસ ચાલુ છે.