પદ્મશ્રીથી સન્માનિત સંગીતકાર જીવવા માટે વેચી રહ્યાં છે ઘરનો સામાન

I am Gujarat

બોલિવૂડની ઝાકમઝાળ પાછળનું અંધારું

ફિલ્મ ઈન્ડસ્ટ્રીમાં જેવું દેખાય છે, તેવું કશું હોતું નથી. એવા કિસ્સા સાંભળવા મળે છે, જેમાં કોઈ કલાકાર ગરીબી અને ગુમનામીની જિંદગી જીવી રહ્યાં હોય છે. ક્યારેક તે હિટ હતા પણ સ્થિતિ ક્યારે બદલાઈ જાય છે, તેની ખબર જ નથી પડતી. આવો જ વધુ એક કિસ્સો સામે આવ્યો છે પ્રખ્યાત સંગીત નિર્દેશક વનરાજ ભાટિયા અંગે. 31 વર્ષ પહેલા સર્વશ્રેષ્ઠ સંગીત નિર્દેશન માટે તેમને રાષ્ટ્રીય ફિલ્મ પુરસ્કાર મળ્યો હતો. 2012માં તેમને દેશના ચોથા સર્વોચ્ચ સન્માન પદ્મશ્રીથી પણ નવાઝવામાં આવ્યા હતા. આજે ભાટિયા સાહેબ દયનીય સ્થિતિમાં જીંદગી પસાર કરી રહ્યાં છે.

મદદની છે જરૂર

અમારા સહયોગી ‘મુંબઈ મિરર’ અનુસાર, આજે ભાટિયા સાહેબને લોકોની મદદની ખૂબ જરૂર છે. તેમની તબિયત ઘણા સમયથી ખરાબ છે. બહારી દુનિયા સાથેનો સંપર્ક લગભગ કપાઈ ગયો છે. ‘મુંબઈ મિરર’ સાથે વાત કરતા તેમણે જણાવ્યું કે, તેમના બેંક એકાઉન્ટમાં હવે એક રૂપિયો પણ બચ્યો નથી.

નોકર જ છે એકમાત્ર સહારો

ભાટિયા સાહેબે જણાવ્યું કે, હવે તેમના સુખ-દુ:ખનો એકમાત્ર સહારો તેમનો નોકર છે. આર્થિક મુશ્કેલીઓ એટલી વધી ગઈ છે કે, ઘણી વખત રોજિંદી જરૂરિયાતો માટે તેમને પોતાના ઘરનો સામાન વેચવો પડે છે.

લાંબા સમયથી નથી થઈ રહી સારવાર

ભાટિયા સાહેબની ઉંમર 92 વર્ષ છે. તેમના નોકરે જણાવ્યું કે, લાંબા સમયથી પૈસાના અભાવને કારણે તેમની સારવાર પણ નથી થઈ રહી. તેમને જોવા-સાંભળવાની પણ તકલીફ છે અને તે વધી રહી છે.

આસ-પાડોશના લોકો કરી રહ્યાં છે મદદ

તેમની મદદ માટે આજુબાજુના લોકો આવતા રહે છે. તેમના જ પ્રતાપે ભાટિયાજીનો જીવન-નિર્વાહ થઈ રહ્યો છે.

‘ભારત એક ખોજ’ અને ‘તમસ’ ભૂલી ગયા?

વનરાજ ભાટિયાએ જ જાણીતી ટીવી સીરિયર ‘ભારત એક ખોજ’ માટે સંગીત આપ્યું હતું. તેમણે શ્યામ બેનેગલની ફિલ્મ ‘અંકુર’ અને ‘ભૂમિકા’ માટે પણ સંગીત આપ્યું હતું. આ ઉપરાંત ‘જાને ભી દો યારો’ પણ તેમણે જ સંગીતબદ્ધ કર્યું હતું. તેમને સંગીત નાટક એકેડેમી પુરસ્કાર પણ મળ્યો છે. ‘મંથન’, ‘ત્રિકાલ’, ‘સૂરજ કા સાતવા ઘોડા’, ‘કલયુગ’, ‘જૂનુન’ જેવી ફિલ્મો માટે પણ તેમણે કામ કર્યું છે.