પ્રિયંકા ચોપરાએ જણાવી Oops મોમેન્ટ, રેડ કાર્પેટ પર વોક કરતાં પહેલા તૂટી ગઈ હતી ચેન

પ્રિયંકા ચોપરા જોનસ હાલ પતિ નિક જોનસ સાથે લંડનમાં છે. અપકમિંગ ફિલ્મનું શૂટિંગ પતાવ્યા બાદ એક્ટ્રેસ નિક સાથે ક્વોલિટી ટાઈમ પસાર કરી રહી છે અને તેની સાથેની રોમાન્ટિક તસવીરો સોશિયલ મીડિયા પર શેર કરી રહી છે. ગુરુવારે (28 જાન્યુઆરી) તેણે ઈન્ટાગ્રામ પર કાન ફિલ્મ ફેસ્ટિવલમાંથી ( Cannes Film Festival) થ્રોબેક સ્ટોરી શેર કરી હતી.

પ્રિયંકા ચોપરાએ Cannes 2019માંથી રેડ કાર્પેટ પર ચાલતી તેની કેટલીક તસવીરોનું કોલાજ પોસ્ટ કર્યું હતું. જેમાં રેડ એન્ડ બ્લેક કલરના શિમરી ડ્રેસમાં જોવા મળી રહી છે. આ તસવીર ભલે જોવામાં પર્ફેક્ટ લાગી રહી હોય પરંતુ પીસીએ જણાવ્યું હતું કે, રેડ કાર્પેટ પર ચાલતી વખતે તે કેટલી ડરેલી હતી. તેણે જે આઉટફિટ પહેર્યું હતું તેની ચેન છેલ્લી ઘડીએ તૂટી ગઈ હતી અને તેની ટીમ તરત જ મદદે આવી હતી.


ફેન્સ સાથે સ્ટોરી શેર કરતાં પ્રિયંકાએ લખ્યું છે કે, 'હું બહારથી ભલે ચિલ લાગતી હોઉ, પરંતુ દરેક વ્યક્તિ થોડુ-ઘણું જાણતી હતી કે હું અંદરથી ડરેલી હતી 😂. રેડ કાર્પેટ માટે નીકળું તેના થોડા સમય પહેલા જ આ વિન્ટેજ @roberto_cavalli ડ્રેસનું ઝિપર બંધ કરતી વખતે તૂટી ગયું હતું. ઉકેલ? મારી અદ્દભુત ટીમે મને કારની અંદર જ 5 મિનિટની રાઈડમાં આ ડ્રેસમાં સિવવો પડ્યો હતો'.


પ્રિયંકા ચોપરાની પોસ્ટ શેર કરતાં, બિગ બોસ 14 ફેમ હિમાંશુ ખુરાનાએ ઈન્સ્ટાગ્રામ સ્ટોરીમાં લખ્યું છે કે, 'Lol, Same Same'. આ પરથી લાગ્યું છે કે, હિમાંશીએ પણ આવી પરિસ્થિતિનો સામનો કર્યો હશે.

પ્રિયંકા ચોપરાની રાજકુમાર રાવ સાથેની ફિલ્મ હાલમાં જ રિલીઝ થઈ છે. ફિલ્મ ઓટીટી પ્લેટફોર્મ પર રિલીઝ કરવામાં આવી છે. આ ફિલ્મમાં પ્રિયંકાની એક્ટિંગના ખૂબ વખાણ થઈ રહ્યા છે. એક્ટ્રેસ હાલ તેના અપકમિંગ પ્રોજેક્ટમાં વ્યસ્ત છે. રાજકુમારે પ્રિયંકા સાથે પહેલીવાર કામ કર્યું છે. ત્યારે તેના સ્વભાવ વિશે વાત કરતાં અગાઉ તેણે કહ્યું હતું કે, 'પ્રિયંકા અસાધારણ છે. તે ચિલ્ડ આઉટ વ્યક્તિ છે. તે ગ્લોબલ સ્ટાર છે તેમ છતાં અમને તેણે ક્યારેય એવું ફીલ નથી કરાવ્યું કે તે અમારા સેટ પર સૌથી મોટી સ્ટાર હતી. પ્રિયંકાએ મારા સીનમાં પણ મદદ કરી હતી. હું તેની સાથે વધારે કામ કરવા તરફ રાહ જોઈ રહ્યો છું અને આશા રાખું છું કે તેમ જલ્દી થશે'.