રાજ કુંદ્રાએ કહ્યું- મને બલિનો બકરો બનાવવામાં આવી રહ્યો છે, મારી સામે કોઈ પુરાવા નથી

પોર્નોગ્રાફી કેસમાં આરોપી બિઝનેસમેન રાજ કુંદ્રાએ શનિવારે મુંબઈની એક કોર્ટમાં જામીન અરજી કરી દાવો કર્યો હતો કે, તેને બલિનો બકરો બનાવવામાં આવી રહ્યો છે, અને સપ્લિમેન્ટરી ચાર્જશીટમાં તેની સામે એકપણ પુરાવો નથી કે જે સાબિત કરી શકે કે તે સીધી રીતે પોર્નોગ્રાફી ફિલ્મ બનાવવામાં સંડોવાયેલો હોય. 19 જુલાઈના રોજ બોલિવૂડ અભિનેત્રી શિલ્પા શેટ્ટીના પતિ રાજ કુંદ્રાની ધરપકડ કરવામાં આવી હતી અને તેની સામે IPC તેમજ ઈન્ફોર્મેશન ટેક્નોલોજી એક્ટ હેઠળ ગુનો નોંધવામાં આવ્યો હતો. હાલમાં તે જ્યુડિશિયલ કસ્ટડીમાં છે. 'આ કેસની તપાસ પૂરી થઈ ગઈ છે'

આ કેસની તપાસ કરી રહેલ ક્રાઈમ બ્રાન્ચ દ્વારા હાલમાં જ પોર્નોગ્રાફી ફિલ્મ બનાવવી અને તેને કોઈ એપ્લિકેશ દ્વારા પ્રસારિત કરવા મામલે રાજ કુંદ્રા અને અન્ય 3 આરોપીઓ સામે સપ્લિમેન્ટરી ચાર્જશીટ દાખલ કરવામાં આવી હતી. જે બાદ રાજ કુંદ્રા દ્વારા જામીન અરજી માટે મેટ્રોપોલિટન કોર્ટના દ્વાર ખટખટાવવામાં આવ્યા હતા અને જણાવવામાં આવ્યું હતું કે, આ કેસની તપાસ વ્યવહારિક રીતે પૂરી થઈ ગઈ છે.

'રાજ કુંદ્રા સામે એકપણ પુરાવો નથી'

રાજ કુંદ્રાના વકીલ પ્રશાંત પાટિલ દ્વારા જામીન અરજી દાખલ કરવામાં આવી હતી. જેમાં કુંદ્રાએ દાવો કર્યો છે કે, 'હોટશોટ' એપને કાનૂની અંદર ગુનો સાબિત કરી શકે તેવો એકપણ પુરાવો આજની તારીખ સુધી નથી. પણ તપાસકર્તા એજન્સી દ્વારા જણાવ્યા મુજબ, આરોપી દ્વારા અશ્લીલ સામગ્રી અપલોડ કરવા અને સ્ટ્રીમ કરવા માટે હોટશોટ એપનો ઉપયોગ કરવામાં આવતો હતો.

જામીન અરજીમાં એવો પણ દાવો કરવામાં આવ્યો છે કે, સમગ્ર સપ્લિમેન્ટરી ચાર્જશીટમાં એવો એકપણ આરોપ લગાવવામાં આવ્યો નથી કે જેમાં કુંદ્રા કોઈપણ વીડિયો શૂટિંગમાં સક્રિય રીતે સામેલ હોય. પણ તે વ્યક્તિગત કલાકાર પર આધાર રાખે છે કે સામગ્રીને એપ પર અપલોડ કરવી કે નહીં. આ ઉપરાંત જામીન અરજીમાં એમ પણ કહેવામાં આવ્યું છે કે, ફરિયાદમાં રાજ કુંદ્રાની સામે એકપણ ગુનાનો ખુલાસો થતો નથી.

'FIRમાં કુંદ્રાનું નામ ન હતું, તેને બલિનો બકરો બનાવાયો છે'

આ ઉપરાંત અરજીમાં એમ પણ કહેવામાં આવ્યું છે કે, કુંદ્રાને ખોટી રીતે કેસમાં ફસાવવામાં આવ્યો છે. તેનું નામ FIRમાં ન હતું, અને પોલીસ દ્વારા તેનું નામ ઢસેડવામાં આવ્યું છે. આ માટેના કારણ તપાસકર્તા એજન્સીને જ ખબર હશે, તેને બલિનો બકરો બનાવવામાં આવી રહ્યો છે. અત્યાર સુધીની તપાસમાં સ્પષ્ટ દેખાઈ રહ્યું છે કે, અશ્લીલ સામગ્રી બનાવવાને લઈ દૂર દૂર સુધી કોઈપણ ગુનામાં રાજ કુંદ્રાની સંડોવણી સામે આવી નથી. એટલું જ નહીં, પણ તે અશ્લીલ સામગ્રીના અપલોડિંગ અને બ્રોડકાસ્ટિંગની પ્રક્રિયામાં પણ સામેલ નથી.