ડ્રગ્સ કેસ: NCBની ઓફિસે પહોંચી રકુલ પ્રીત સિંહ, દીપિકાની મેનેજરની પણ આજે થશે પૂછપરછ

બોલિવુડ ડ્રગ્સ લિંકમાં શુક્રવારે નાર્કોટિક્સ કંટ્રોલ બ્યૂરો રકુલ પ્રીત સિંહની આજે પૂછપરછ કરશે. રકુલ પ્રીત સિંહ NCB ગેસ્ટહાઉસ પહોંચી ગઈ છે. રકુલ ઉપરાંત આજે દીપિકા પાદુકોણની મેનેજર કરિશ્મા પ્રકાશ અને ધર્મા પ્રોડક્શનના ડાયરેક્ટર ક્ષિતિજ પ્રસાદને પણ પૂછપરછ માટે બોલાવ્યા છે. NCB સૌથી પહેલા આજે રકુલ પ્રીત સિંહની પૂછપરછ કરશે. આમ તો ગુરુવારે નાર્કોટિક્સ કંટ્રોલ બ્યૂરોએ ગુરુવારે રકુલને પૂછપરછ માટે બોલાવી હતી પરંતુ તેની ટીમે સમન્સ ના મળ્યું હોવાની વાત કરી હતી. જો કે, હવે શુક્રવારે રકુલ NCB ઓફિસ પહોંચી ગઈ છે. દીપિકા પાદુકોણની મેનેજર કરિશ્મા પ્રકાશ પણ NCBની ઓફિસે પહોંચી ગઈ છે.

સમય કરતાં અડધો કલાક વહેલી NCB ગેસ્ટ હાઉસ પહોંચી રકુલ

રકુલ પ્રીત સિંહ સમય કરતાં અડધો કલાક વહેલી જ નાર્કોટિક્સ કંટ્રોલ બ્યૂરોના ગેસ્ટ હાઉસમાં પહોંચી ગઈ હતી. રિયા ચક્રવર્તીની પૂછપરછ દરમિયાન રકુલ પ્રીત સિંહનું નામ સામે આવ્યું હતું. રકુલ પ્રીત બાદ શનિવારે દીપિકા પાદુકોણ, સારા અલી ખાન અને શ્રદ્ધા કપૂરની પૂછપરછ થવાની છે. રકુલની ટીમે ગુરુવારે સમન્સ ન મળવાનું કહ્યું હતું જેને NCBએ 'બહાનું' ગણાવ્યું હતું. જે બાદ NCBની ટીમે રકુલ પ્રીતના ઘરે જઈને સમન્સની હાર્ડકોપી આપી હતી. રકુલ હૈદરાબાદમાં હતી અને ગુરુવારે રાત્રે મુંબઈ આવી પહોંચી હતી.

રકુલ પ્રીતને શું પૂછશે NCB?

રકુલ પ્રીતને ડ્રગ્સ કનેક્શન, સુશાંત અને રિયા ચક્રવર્તી સાથેની ફ્રેન્ડશિપ વિશે સવાલ કરવામાં આવશે. નાર્કોટિક્સ કંટ્રોલ બ્યૂરો રકુલ પાસેથી જાણવા માગશે કે શું તેણે ક્યારેય ડ્રગ્સ લીધા છે અથવા તો ડ્રગ્સ ખરીદ્યા છે. બોલિવુડની ડ્રગ પાર્ટીઝ વિશે કેટલી જાણકારી તે પણ રકુલને પૂછાશે. રસપ્રદ વાત એ છે કે, સાઉથ ફિલ્મ ઈન્ડસ્ટ્રીમાં રકુલનું મોટું નામ છે. સીસીબી પહેલા જ સેંડલવુડમાં ડ્રગ કનેક્શનની તપાસ ચલાવે છે, એવામાં રકુલ પ્રીતને સાઉથ ઈન્ડિયન ફિલ્મ ઈન્ડસ્ટ્રીના ડ્રગ રેકેટ વિશે પણ સવાલ થઈ શકે છે.

ટીવી એક્ટર્સના ઘરેથી મળ્યું ડ્રગ્સ

આ તરફ ટીવી એક્ટર્સ સનમ જોહર અને અબિગેલ પાંડેની મુશ્કેલીઓ વધતી દેખાઈ રહી છે. દરોડા દરમિયાન તેમના ઘરેથી ખૂબ ઓછી માત્રામાં NCBને ડ્રગ્સ મળી આવ્યું હતું. તેમની સામે ડ્રગ્સ લેવાના આરોપમાં કેસ દાખલ કરાયો છે. દરમિયાન મુંબઈમાં NCBએ ત્રણ સ્થળોએ દરોડા પાડ્યા છે. કહેવાઈ રહ્યું છે કે, અંધેરી અને પવઈમાં ત્રણ સ્થળે NCBની રેડ ચાલી રહી છે. ડ્રગ પેડલર્સે લગભગ 39 નામ જણાવ્યા છે જેમાં ટીવી ઈન્ડસ્ટ્રીના લોકો પણ સામેલ છે.

કરિશ્માના જવાબના આધારે થશે દીપિકાની પૂછપરછ

દીપિકાની મેનેજર કરિશ્મા પ્રકાશ પણ હાલ નાર્કોટિક્સ કંટ્રોલ બ્યૂરોની ઓફિસે હાજર છે. કરિશ્મા અને દીપિકાની ચેટમાં સ્પષ્ટપણે હેશ અને વીડ જેવા ડ્રગ્સનો ઉલ્લેખ છે. કરિશ્મા ક્વાન ટેલેન્ટ મેનેજમેન્ટ એજન્સીની કર્મચારી છે. આ કંપની સાથે જ જયા સાહા જોડાયેલી છે. ત્યારે કરિશ્માની પૂછપરછમાં ઘણા મહત્વના ખુલાસા થઈ શકે છે. ટેલેન્ટ મેનેજમેન્ટ કંપનીઓ પર આરોપ છે કે તેઓ સેલિબ્રિટીઝને ડ્રગ્સ પૂરા પાડે છે. ત્યારે કરિશ્માની પૂછપરછમાં ઘણા મોટા એક્ટર્સના નામ સામે આવી શકે છે.

જયા સાહાની પૂછપરછમાં ખુલ્યા હતા ઘણા નામ

રિયા ચક્રવર્તીની ડ્રગ્સ ચેટમાં ટેલેન્ટ મેનેજર જયા સાહાનું નામ સામે આવ્યું હતું. જે બાદ NCBએ જયા સાહાની લાંબી પૂછપરછ કરી છે, જેમાં બોલિવુડના મોટા એક્ટર્સના નામ સામે આવ્યા છે. જયા સાહા પર આ એક્ટર્સને ડ્રગ્સ પૂરા પાડવાનો આરોપ છે. અત્યાર સુધીમાં સારા અલી ખાન, શ્રદ્ધા કપૂર, રકુલ પ્રીત, દીપિકા પાદુકોણ અને ડિઝાઈનર સિમોન ખંબાટાના નામ સામે આવ્યા હતા. શુક્રવારે NCBએ સિમોન ખંબાટાની પૂછપરછ કરી હતી.