જિમની બહાર જોવા મળી રિયા ચક્રવર્તી, ફોટોગ્રાફર્સે ખબર પૂછતાં કહ્યું- 'ઠીક થઈ રહી છું'

બોલિવુડ એક્ટ્રેસ રિયા ચક્રવર્તી માટે 2020નું વર્ષ થોડું વધારે જ મુશ્કેલ રહ્યું હતું. હવે લાગી રહ્યું છે કે, રિયા 2021માં ફિટનેસ પર ધ્યાન આપી રહી છે. રિયાએ છેલ્લા થોડા દિવસોથી જિમ જવાનું શરૂ કર્યું છે. શુક્રવારે બપોરે રિયા જિમની બહાર નીકળતી જોવા મળી હતી. ત્યારે ત્યાં હાજર ફોટોગ્રાફર્સે રિયાના ખબરઅંતર પૂછ્યા હતા.

બ્લેક ટી શર્ટ અને બ્લેક એન્ડ વ્હાઈટ જિમ પેન્ટમાં રિયા જોવા મળી હતી. રિયા જિમમાંથી નીકળીને કારમાં બેસવા જતી હતી ત્યારે ફોટોગ્રાફર્સે તેને પૂછ્યું હતું 'કેમ છો?' જેના જવાબમાં રિયાએ કહ્યું હતું કે, 'ઠીક થઈ રહી છું (ઠીક હો રહી હૂં)'. કોરોના મહામારીને ધ્યાનમાં રાખીને 'જલેબી' એક્ટ્રેસે માસ્ક પણ પહેર્યું હતું. મહત્વનું છે કે, આ એ જ જિમ છે જ્યાં સુશાંત સિંહ રાજપૂત અને રિયા ચક્રવર્તી અગાઉ વર્કઆઉટ માટે આવતા હતા.


થોડા દિવસ પહેલા રિયા પોતાના ભાઈ શોવિક ચક્રવર્તી સાથે જિમમાં આવી હતી. રિયા હાલ તો પોતાની ફિટનેસ પર ધ્યાન આપી રહી છે ત્યારે લાગી રહ્યું છે કે તે ફિલ્મોમાં કમબેકની તૈયારી કરી રહી છે. ડ્રગ્સ કેસમાં જામીન મળ્યા પછી રિયા ખાસ્સા સમય સુધી જાહેર સ્થળોએ જોવા મળી નહોતી. દોઢેક મહિના પહેલા રિયા અને તેનો ભાઈ શોવિક મુંબઈમાં ઘર શોધતાં પણ નજરે ચડ્યા હતા.

મહત્વનું છે કે, બોલિવુડ એક્ટર સુશાંત સિંહ રાજપૂત અને રિયા ચક્રવર્તી રિલેશનશીપમાં હતા. 14 જૂન 2020ના રોજ સુશાંત સિંહ રાજપૂત બાંદ્રા સ્થિત ઘરે મૃત હાલતમાં મળી આવ્યો હતો. જે બાદ સ્વર્ગસ્થ એક્ટરના પરિવારે રિયા સામે ફરિયાદ નોંધાવી હતી. સુશાંતના મોત કેસની તપાસ દરમિયાન ડ્રગ્સ એંગલ બહાર આવતાં રિયા અને તેના ભાઈને જેલ થઈ હતી. તેમના પર કથિત રીતે સુશાંતને ડ્રગ્સ પૂરા પાડવાનો આરોપ હતો. જો કે, હાલ તો બંને જામીન પર મુક્ત છે. આ તરફ સુશાંતના મોત કેસની તપાસ CBI, NCB અને ED ચલાવી રહ્યું છે.