લગભગ એક મહિનાથી જેલમાં છે રિયા ચક્રવર્તી, ફરી એકવાર લંબાવાઈ જ્યૂડિશિયલ કસ્ટડી

સુશાંત સિંહ રાજપૂતના મોત મામલે ડ્રગ્સ એંગલ સામે આવ્યા બાદ નાર્કોટિક્સ કંટ્રોલ બ્યૂરોએ દિવંગત એક્ટરની ગર્લફ્રેન્ડ રિયા ચક્રવર્તી અને તેના ભાઈ શોવિક ચક્રવર્તીની ધરપકડ કરી હતી. 8 સપ્ટેમ્બરે રિયા ચક્રવર્તી તથા તેના ભાઈ શોવિકની 4 સપ્ટેમ્બરે ધરપકડ કરી હતી. આજે સ્પેશિયલ NDPS કોર્ટે રિયા અને તેના ભાઈ શોવિકની જ્યૂડિશિયલ કસ્ટડી 20 ઓક્ટોબર સુધી લંબાવી છે.


રિયા અને શોવિકની જ્યૂડિશિયલ કસ્ટડી દર 14 દિવસે લંબાવાઈ રહી છે. અગાઉ 6 ઓક્ટોબર સુધી તેમને જ્યૂડિશિયલ કસ્ટડીમાં રાખવાનો આદેશ અપાયો હતો, જે બાદ આજે ફરીથી કોર્ટે તેમની જ્યૂડિશિયલ કસ્ટડી લંબાવી છે. રિપોર્ટ મુજબ, રિયા અને શોવિકે કોર્ટમાં જામીન અરજી કરી છે અને તેના પર આવતીકાલે ચુકાદો આવી તેવી સંભાવના છે. જો હાઈકોર્ટ રિયા અને શોવિકની જામીન મંજૂર કરે તો તેમને મુક્ત કરવામાં આવશે.

અગાઉ જ્યૂડિશિયલ કસ્ટડી લંબાવાઈ ત્યારે નાર્કોટિક્સ કંટ્રોલ બ્યૂરોના અધિકારીઓ શોવિક ચક્રવર્તીનું નિવેદન નોંધવા માટે જેલ પહોંચ્યા હતા. ઉલ્લેખનીય છે કે, રિયા અને શોવિક ઉપરાંત સુશાંતના પર્સનલ સ્ટાફ મેમ્બર સેમ્યુઅલ મિરાન્ડા અને દીપેશ સાવંતની પણ ડ્રગ્સ કેસમાં ધરપકડ કરાઈ છે. આ તમામે પૂછપરછ દરમિયાન જણાવ્યું છે કે, તેઓ સુશાંત માટે ડ્રગ્સ લાવતા હતા.


તો આ તરફ સુશાંતના મોત મામલે AIIMSએ પોતાનો રિપોર્ટ સીબીઆઈને સોંપી દીધો છે. એમ્સના રિપોર્ટ બાદ અને તે પહેલા પણ ઘણા સેલેબ્સ રિયા ચક્રવર્તીને મુક્ત કરવાની માગ કરી ચૂક્યા છે. આજે ફિલ્મમેકર અનુભવ સિન્હાએ ટ્વિટ કરીને લખ્યું કે, "એ છોકરી એક મહિનાથી જેલમાં છે. ખરેખર યાર!!". અનુભવ સિન્હાના ટ્વિટનો જવાબ આપતાં એક્ટ્રેસ સ્વરા ભાસ્કરે લખ્યું, "રિયા ચક્રવર્તીને મુક્ત કરો."

આ પહેલા કનિકા ધિલ્લોને પણ રિયાને છોડવાની માગ કરી હતી. કનિકાએ લખ્યું હતું, "ષડયંત્રની થિયરીઓ હવે ખોટી સાબિત થઈ રહી છે ત્યારે એક યુવાન છોકરી હજી જેલમાં છે. સીબીઆઈએ કહ્યું છે કે, ષડયંત્ર લાગતું નથી ત્યારે રિયા ચક્રવર્તીને ક્યાં સુધી અને કયા ગુનામાં જેલમાં રાખવામાં આવશે. જામીન નહીં આપવામાં આવે? @NCWIndia શું કોઈ મને જવાબ આપશે?" મહત્વનું છે કે, રિયા ચક્રવર્તી લગભગ છેલ્લા એક મહિનાથી મુંબઈની ભાયખલા જેલમાં બંધ છે.