સલમાને પાળ્યું વચન, મહારાષ્ટ્રના પૂર પીડિત ગામમાં 70 ઘરનું બાંધકામ શરુ કરાવ્યું

બોલિવુડનો 'ભાઈજાન' સલમાન ખાન કરોડો લોકોના દિલ પર રાજ કરે છે. તેને પ્રેમ કરનારા તેના ફેન્સ હંમેશા તેને સ્ક્રીન પર જોવા માટે ઉત્સાહિત હોય છે. આ સિવાય તે જરૂરિયાતમંદોની મદદ કરવા માટે પણ હંમેશા આગળ રહે છે. આ જ કારણથી સલમાન ફરી એકવાર ચર્ચામાં આવ્યો છે. વાત એમ છે કે, મહારાષ્ટ્રના ખિદ્રાપુર ગામના લોકોની હાલત પૂરના કારણે કફોડી બની ગઈ હતી. તેથી સલમાને આ ગામમાં 70 નવા ઘર બનાવી આપવાની જાહેરાત કરી હતી. સલમાને આ વચનને પાળ્યું છે અને હાલ ત્યાં ઘરોનું કન્સ્ટ્રક્શન કામ શરૂ કરાવ્યું છે.



મહારાષ્ટ્રના મંત્રી રાજેન્દ્ર પાટિલે ટ્વીટ કરીને સલમાન ખાન દ્વારા પૂરા કરવામાં આવેલા વચન વિશે જાણકારી આપી છે. સાથે જ તેણે મહારાષ્ટ્રના કોલ્હાપુર જિલ્લાના ખિદ્રાપુર ગામમાં ભૂમિ પૂજન કરતા હોય તેની કેટલીક તસવીરો શેર કરી છે. 70 ઘર બનાવી આપવા બદલ આભાર પણ માન્યો છે.

લોકડાઉન દરમિયાન સલમાન ખાન પનવેલ સ્થિત ફાર્મહાઉસમાં હતો. આ દરમિયાન તેણે પોતાના ફાર્મમાં જેક્લિન ફર્નાન્ડિઝ સાથે એક સોન્ગ પણ શૂટ કર્યું હતું. 'તેરે બિના' સોન્ગ પર ફેન્સે ખૂબ પ્રેમ વરસાવ્યો હતો. જે સોશિયલ મીડિયા પર પણ ખૂબ વાયરલ થયું હતું.

વર્ક ફ્રંટની વાત કરીએ તો, સલમાન ખાન 'રાધેઃ યોર મોસ્ટ વોન્ટેડ ભાઈ'માં જોવા મળશે, જેમાં તેની ઓપોઝિટમાં દિશા પાટની છે. આ ફિલ્મમાં રણદીપ હુડ્ડા અને જેકી શ્રોફ પણ મહત્વના રોલમાં જોવા મળશે. આ સિવાય સલમાન કિક-1 અને કભી ઈદ કભી દિવાલીમાં જોવા મળશે.