કંગનાનો મોટો આરોપ, શિવસેનાના નેતા સંજય રાઉતે મુંબઈ પરત ના ફરવા આપી ધમકી

મુંબઈ: બોલીવુડમાં ચાલતા સગાવાદ અને ઈન્ડસ્ટ્રીના ટોચના કેટલાક સ્ટાર્સની ડ્રગ લિંક અંગે મોટા આક્ષેપો કરી રહેલી કંગના રનૌતે હવે મોટો ધડાકો કર્યો છે. શિવસેનાના નેતા સંજય રાઉત પર કંગનાએ સીધેસીધો આક્ષેપ મૂક્યો છે કે રાઉતે તેને મુંબઈ પાછા ના આવવાની ધમકી આપી છે. કંગના હાલ પોતાના હોમટાઉનમાં છે. થોડા દિવસ પહેલા કંગનાએ પોતાને મુંબઈ પોલીસથી ખતરો હોવાનો પણ દાવો કર્યો હતો.

કંગનાએ ટ્વીટ કર્યું છે કે શિવસેનાના લીડર સંજય રાઉતે મને ખૂલ્લી ધમકી આપી છે અને કહ્યું છે કે હું મુંબઈ પાછી ના ફરું. મુંબઈની ગલીઓમાં આઝાદી ગ્રેફિટી, અને હવે ખૂલ્લી ધમકી... મુંબઈ પાકિસ્તાન હસ્તકના કાશ્મીર જેવી ફિલિંગ કેમ આપી રહ્યું છે?


થોડા દિવસ પહેલા કંગનાએ કહ્યું હતું કે તેને બોલીવુડની ડ્રગ લિંકને લઈને ઘણી માહિતી ધરાવે છે. તે નારકોટિક્સ કંટ્રોલ બ્યૂરોની મદદ લકરવા ચાહે છે, પરંતુ તેને સુરક્ષા જોઈએ. જેના પર ભાજપના નેતા રામ કદે મહારાષ્ટ્ર સરકારને ટ્વીટ કરી આ સવાલ ઉઠાવ્યો હતો. જેના પર કંગનાએ જવાબ આપ્યો હતો કે તે કેન્દ્ર સરકાર કે પછી હિમાચલ પ્રદેશની સુરક્ષા ઈચ્છે છે. તેણે મુંબઈ પોલીસની સુરક્ષા લેવાનો સ્પષ્ટ ઈનકાર કરી દીધો હતો.

પ્રાપ્ત માહિતી અનુસાર, શિવસેનાના મુખપત્ર સામનામાં સંજય રાઉતે એક આર્ટિકલમાં લખ્યું છે કે મુંબઈમાં રહીને કંગનાનું આવું કહેવું શરમજનક છે. રાઉતે તેમાં લખ્યું છે કે, 'અમે કંગનાને વિનંતી કરીએ છીએ કે તે મુંબઈ પરત ના ફરે. આ મુંબઈ પોલીસની બેઈજ્જતી છે. ગૃહમંત્રાલયે તેના પર એક્શન લેવું જોઈએ.'

ઉલ્લેખનીય છે કે, ગઈકાલે પણ કંગનાએ એક ટ્વીટ કરીને રણબીર કપૂર, રણવીર સિંહ અને વિકી કૌશલને પોતાનો બ્લડ ટેસ્ટ કરાવી તેઓ ડ્રગ્સ નથી લેતા તે વાતની સાબિતી આપવા કહ્યું હતું. કંગનાએ પોતાના ટ્વીટમાં જણાવ્યું હતું કે આમ કરીને આ ત્રણેય એક્ટર્સ લાખો યુવકોને ડ્રગ્સથી દૂર રહેવાની પ્રેરણા આપી શકે છે.