એક્ટર સતીષ કૌશિકના પોસ્ટમોર્ટમ રિપોર્ટમાં શું સામે આવ્યું? પોલીસ હવે CCTV ચેક કરશે?

બોલિવૂડ એક્ટર અને ફિલ્મમેકર સતીશ કૌશિક હવે આપણી વચ્ચે નથી રહ્યા. તેમણે આ દુનિયાને અલવિદા કહ્યું. તેમણે દિલ્હીમાં અંતિમ શ્વાસ લીધા. તેમના મોત પાછળનું કારણ હાર્ટ એટેક હોવાનું જણાવવામાં આવ્યું હતું, પરંતુ તેમ છતાં તેમનું પોસ્ટમોર્ટમ કરવામાં આવ્યું હતું. કારણકે તે દિલ્હીમાં જ્યાં રોકાયા હતા તે ફાર્મહાઉસમાંથી ઘણી દવાઓ મળી આવી હતી. હવે રિપોર્ટ આવ્યો છે, જેમાં ઘણાં ખુલાસા થયા છે.

બોલિવૂડ એક્ટર અને ફિલ્મમેકર સતીશ કૌશિકના પોસ્ટમોર્ટમ રિપોર્ટમાં ખુલાસો થયો છે કે અભિનેતા હાયપર ટેન્શન અને શુગરના દર્દી હતા. તેમને હાઈ બીપી એટલે કે બ્લડપ્રેશરની પણ સમસ્યા હતી. પોલીસને હજુ સુધી કશું શંકાસ્પદ મળ્યું નથી. જણાવવામાં આવી રહ્યું છે કે સતીશ કૌશિકનું પોસ્ટમોર્ટમ ચાર ડોક્ટર્સ દ્વારા કરવામાં આવ્યું હતું. આ દરમિયાન તેમણે વિડીયોગ્રાફી અને ફોટોગ્રાફી પણ કરી હતી, જેથી તે રેકોર્ડમાં રાખી શકાય.

મીડિયા રિપોર્ટ્સ અનુસાર, દિલ્હી પોલીસ સતીશ કૌશિક મૃત્યુ કેસમાં 7 કલાકના CCTV ફૂટેજની તપાસ કરશે. અભિનેતાના પોસ્ટમોર્ટમ રિપોર્ટમાં મૃત્યુનું કારણ કાર્ડિયાક અરેસ્ટ જણાવવામાં આવ્યું છે. તેમને હાર્ટ એટેક આવ્યો હતો. હવે તેમના હાર્ટ અને બ્લડ સેમ્પલની તપાસ પણ કરવામાં આવશે, જેનો રિપોર્ટ આગામી 15 દિવસમાં પોલીસને સોંપવામાં આવશે. પોલીસને આશા છે કે આ રિપોર્ટથી ઘણી બાબતો સ્પષ્ટ થશે.

અગાઉ સતીષ કૌશિકના મેનેજર સંતોષ રાયે જણાવ્યું હતું કે, રાતે 10.30ની આસપાસ તેઓ ઊંઘવા માટે જતા રહ્યા હતા. પરંતુ મોડી રાતે આશરે 12.10 વાગ્યે તેમણે અચાનક બોલાવ્યા હતા અને શ્વાસ લેવામાં તકલીફ થઈ રહી હોવાનું કહ્યું હતું. તેમણે છાતીમાં દુઃખાવાની ફરિયાદ કરી હતી. ત્યારબાદ તેમને તરત જ નજીકની હોસ્પિટલમાં લઈ જવાયા હતા. અંદર પહોંચે તે પહેલા જ તેમણે દમ તોડ્યો હતો. હરિયાણાના એક નાનકડા ગામમાં જન્મેલા સતીષ કૌશિકે બાળપણથી જ એક્ટર બનવાનું સપનું જોયું હતું અને તેને પૂરું પણ કર્યું.