ફરી પડદા પર જીવંત થશે 'રાજ' અને 'પ્રેમ', આમિરની ફિલ્મમાં કામ કરશે શાહરૂખ-સલમાન!

1993માં આશુતોષ ગોવારીકર બે ખાન- શાહરૂખ અને આમિરને તેમની ડિરેક્ટર તરીકેની ડેબ્યૂ ફિલ્મ 'પહેલા નશા'માં સાથે લાવવામાં સફળ રહ્યા હતા. આમિર ખાન અને શાહરૂખ ખાને આ ફિલ્મમાં કેમિયો રોલ કર્યો હતો. આજ સુધી આ જ એકમાત્ર ફિલ્મ છે જેમાં આમિર ખાન અને શાહરૂખ ખાન સ્ક્રીન શેર કરી છે. આમિર ખાન અને શાહરૂખ ખાન મન્સૂર ખાનની 'જોશ' અને રાકેશ ઓમપ્રકાશ મહેરાની 'રંગ દે બસંતી'માં સાથે કામ કરવાના હતા પરંતુ અંતે આ શક્ય બન્યું નહોતું.

હવે 27 વર્ષ બાદ શાહરૂખ ખાને આમિર ખાનની આગામી ફિલ્મ 'લાલ સિંહ ચઢ્ઢા' માટે કેમિયો શૂટ કર્યો છે. ગયા મહિને UAE જતાં પહેલા શાહરૂખ ખાને દિલ્હી જઈને આ કેમિયો રોલનું શૂટિંગ કર્યું હતું. જણાવી દઈએ કે, અદ્વૈત ચંદનના દિગ્દર્શનમાં બનનારી આ ફિલ્મ હોલિવુડ એક્ટર ટોમ હેન્ક્સની ક્લાસિક મૂવી 'ફોરેસ્ટ ગમ્પ'ની હિંદી રિમેક છે. જેમાં લીડ એક્ટરના જીવનના પાંચ દાયકાની જર્ની બતાવાઈ છે.

મુંબઈ મિરરના અહેવાલ પ્રમાણે, 'લાલ સિંહ ચઢ્ઢા'માં શાહરૂખ ખાનનો ટ્રેક 90ના દાયકા આધારિત હશે. આ ફિલ્મ માટે શાહરૂખ ખાન 'દિલવાલે દુલ્હનિયા લે જાયેંગે'ના રાજ મલ્હોત્રાનું યાદગાર પાત્ર ભજવશે.

મુંબઈ મિરરને સૂત્રએ જણાવ્યા અનુસાર, "દરેક દશકની ઐતિહાસિક ક્ષણોથી સ્ક્રીનપ્લે ગૂંથવામાં આવ્યો છે અને આપણે ફિલ્મી હીરોને ખૂબ પ્રેમ કરીએ છીએ ત્યારે ચઢ્ઢાની જર્ની ચોક્કસ ટોપ સ્ટાર્સ વિના અધૂરી રહેશે. માટે જ, પોતાને શોધવાની આ સફરમાં DDLJની રિલીઝની આસપાસ આમિર ખાન ફિલ્મના સેટ પર પહોંચે છે અને શાહરૂખ ખાન સાથે મુલાકાત થાય છે. તેની સાથે પોતાના અંગત અનુભવો વહેંચે છે." સૂત્રનું માનીએ તો, આમિર અને શાહરૂખ વચ્ચેનો આ સંવાદ હાસ્યની ઘણી ક્ષણો લાવશે. શાહરૂખનું રાજનું પાત્ર 1994ની મૂળ ફિલ્મના ડિક કેવેટ (Dick Cavett)ના કેમિયો રોલનું અપગ્રેડેડ વર્ઝન હશે.

હાલ 55 વર્ષનો શાહરૂખ DDLJના રાજ જેવો કેવી રીતે લાગશે તે વિશે સૂત્રએ જણાવ્યું, "શાહરૂખ 1995ના સમયમાં પાછો જશે. પ્રોસ્થેટિક્સ અને VFXની મદદથી શાહરૂખને યુવાન બતાવાશે. શાહરૂખનો આ કેમિયો સાધારણ નહીં હોય. તેનો ટ્રેક પણ ફિલ્મની વાર્તામાં મહત્વનો ફાળો ભજવશે."

આટલું ઓછું હોય તેમ આમિર વધુ એક ખાનને ફિલ્મમાં લાવવાની તૈયારી કરી રહ્યો છે. સલમાન ખાનને આ ફિલ્મમાં કેમિયો કરવા માટે આમિર મનાવી રહ્યો છે. જો કે, સલમાન ફિલ્મ સાથે જોડાશે તો કયું પાત્ર કરશે તે અંગે નિર્ણય હજી લેવાયો નથી. સૂત્રએ જણાવ્યું, "90ના દશકામાં સલમાન ખાને પ્રેમ બનીને દર્શકોનું દિલ જીત્યું હતું. 'મેંને પ્યાર કિયા', 'હમ આપકે હૈ કૌન' અને 'હમ સાથ સાથ હૈ'માં સલમાનના કેરેક્ટરનું નામ પ્રેમ હતું. પોતાની આગામી ફિલ્મમાં આમિર ફરીથી આ પ્રેમને પડદા પર જીવંત કરવા માગે છે. ફિલ્મમાં એક ટ્રેક છે જેમાં દર્શાવાયું છે કે 1989માં દર્શકોનો ટેસ્ટ કેવી રીતે બદલાય છે. તેઓ એક્શનથી રોમાન્સ તરફ વળ્યા અને સલમાનનો ક્રેઝ વધ્યો. તેઓ ઝડપથી જ આની વિગતો પણ નિર્ણય લઈ લેશે. અગાઉ વિચાર્યું હતું કે, આમિર 'કરણ અર્જુન'ના સેટ પર શાહરૂખ-સલમાનને મળશે પરંતુ એ વિચાર છેવટે રદ્દ કરાયો હતો." જો કે, સલમાન 'લાલ સિંહ ચઢ્ઢા'માં કામ કરવા તૈયાર થયો તો પહેલીવાર કોઈ ફિલ્મમાં ખાન ત્રિપુટી સાથે જોવા મળશે.


'વિક્રમ વેધા' એક્ટર વિજય સેતુપતિ પણ 'લાલ સિંહ ચઢ્ઢા'નો ભાગ હશે. કહેવાઈ રહ્યું છે કે, વિજય આ ફિલ્મમાં લીડ એક્ટરના બેસ્ટફ્રેન્ડ 'બબ્બા'નો રોલ કરશે. આમિરની ફિલ્મમાં કરીના કપૂર ખાન લીડ એક્ટ્રેસ છે. ક્રિસમસ 2021 વખતે 'લાલ સિંહ ચઢ્ઢા' રિલીઝ થવાની છે.