શાહરૂખ ખાનના 55મા બર્થ ડે પર થશે વર્ચ્યુઅલ પાર્ટી, દુનિયાભરના ફેન્સ જોડાશે

કિંગ ખાન શાહરૂખનો બર્થ ડે દુનિયાભરના તેના ફેન્સ માટે કોઈ ઉત્સવથી ઓછો નથી હોતો. દર વર્ષે શાહરૂખના ફેન્સ તેના જન્મદિવસ પર 'મન્નત'ની બહાર ભેગા થાય છે. બર્થ ડે પર શાહરૂખની એક ઝલક મેળવવા અને તેને શુભેચ્છા પાઠવવા માટે ફેન્સ મુંબઈ સ્થિત એક્ટરના ઘર 'મન્નત'ની બહાર મોટી સંખ્યામાં એકઠા થાય છે. પરંતુ આ વખતે કોરોના મહામારીના કારણે આ શક્ય નથી. જો કે, ફેન્સે પોતાના પ્રિય એક્ટરનો બર્થ ડે ખાસ બનાવવા માટે પ્લાનિંગ કરી દીધું છે.

'SRKians'એ આ વખતે શાહરૂખ માટે વર્ચ્યુઅલ બર્થ ડે પાર્ટીનું આયોજન કર્યું છે. આ પાર્ટીમાં દુનિયાભરના શાહરૂખ ખાનના ફેન્સ જોડાઈ શકશે.

મુંબઈ મિરરના રિપોર્ટ પ્રમાણે, શાહરૂખ ખાનના ફેન ક્લબના એક મેમ્બરે કહ્યું, કે તેઓ પોતપોતાના ઘરે શાહરૂખની બર્થ ડે પર કેક કાપશે અને લાઈવ સ્ટ્રીમિંગ દ્વારા સેલિબ્રેશનમાં જોડાશે. રિપોર્ટ પ્રમાણે, મધ્યરાત્રિએ સેલિબ્રેશન કર્યા પછી સોમવારે સવારે 11 વાગ્યે વર્ચ્યુઅલ બર્થ ડે પાર્ટી યોજાશે. જેમાં સેલ્ફી બૂથ, ગેમ્સ, SRK ક્વિઝ, ફેન્સનું એકબીજા સાથેની લાઈવ વાતચીત અને કેટલાક પર્ફોર્મન્સ પણ થશે.

આ ઉપરાંત સેનિટાઈઝર અને માસ્ક સાથેની 5555 કોવિડ કિટ્સનું વિતરણ, 5555 ભૂખ્યા લોકોને ભોજન કરાવવા જેવી ચેરિટી એક્ટિવિટી પણ થશે. આ સિવાય શાહરૂખના બર્થ ડે પર ફેન્સ ઘરડાં ઘર અને અનાથ આશ્રમમાં જઈને પણ ખુશીઓ વહેંચશે. ઉલ્લેખનીય છે કે, 2 નવેમ્બરના રોજ શાહરૂખ ખાન 55 વર્ષનો થશે. તેના બર્થ ડે માટે ફેન્સે અત્યારથી જ તૈયારીઓ શરૂ કરી દીધી છે.

જણાવી દઈએ કે, શાહરૂખ ખાન અને તેનો પરિવાર હાલ UAEમાં છે. IPL 2020 ચાલી રહી છે ત્યારે શાહરૂખ 'કોલકાતા નાઈટ રાઈડર્સ' નામની ટીમનો માલિક છે. ટીમ મેમ્બર્સને સપોર્ટ આવવા માટે તે UAE ગયો છે. હાલમાં જ શાહરૂખે ટ્વિટર પર ફેન્સ સાથે #AskSRK સેશન રાખ્યું હતું. જેમાં તેણે ફેન્સને વિનંતી કરી હતી કે, આ વખતનું સેલિબ્રેશન દૂરથી કરે. SRKએ કહ્યું હતું, 'ઈસ બાર કા પ્યાર થોડા દૂર સે યાર.'