વરુણ ધવન બાદ શ્રદ્ધા કપૂરના લગ્નની ચર્ચા, પિતા શક્તિ કપૂરે કહી દીધી મોટી વાત

વરુણ ધવનની હાલમાં સોશિયલ મીડિયા પોસ્ટ પરથી ફેન્સ અટકળો લગાવી રહ્યા છે કે, શ્રદ્ધા કપૂર તેના કથિત બોયફ્રેન્ડ-ફોટોગ્રાફર રોહન શ્રેષ્ઠ સાથે ટૂંક સમયમાં લગ્નના બંધનમાં બંધાઈ શકે છે. વરુણે તેની બાળપણની મિત્ર નતાશા દલાલ સાથે રવિવારે લગ્ન કર્યા હતા અને રોહને કરેલી વિશનો તેણે જે જવાબ આપ્યો હતો તેના પરથી આ ચર્ચા જાગી છે.

ETimesએ શ્રદ્ધા કપૂરના પિતા શક્તિ કપૂર સાથે આ વિશે વાત કરી હતી. ત્યારે તેમણે કહ્યું કે, 'મને નથી ખબર કે ઈન્ટરનેટ પર કેવા રિપોર્ટ્સ અને ચર્ચા ચાલી રહી છે. પરંતુ હું હંમેશા મારી દીકરીને પડખે ઉભો રહીશ'. તેનો અર્થ શું થયો તેમ પૂછતાં આગળ તેમણે કહ્યું કે, 'તેનો અર્થ એ થયો કે, લગ્નથી લઈને દરેક પ્રકારના નિર્ણય તે પોતાની જાતે કરી શકે છે. રોહન શ્રેષ્ઠ જ કેમ? જો તે મારી પાસે આવશે અને કહેશે કે તેને કોઈ ગમે છે અને તેની સાથે સેટલ થઈ જવા માગે છે, તો પણ મને તે પ્રત્યે વાંધો હશે નહીં'.

રોહન વિશે વાત કરતાં શક્તિ કપૂરે કહ્યું કે, 'રોહન સારો છોકરો છે. તે ઘરે આવતો રહે છે. પરંતુ તે નાનો હતો ત્યારથી ઘરે આવે છે. શ્રદ્ધાએ મને કહ્યું નથી કે તેને તેની સાથે લગ્ન કરવા છે. મારા માટે તેઓ હજુ બાળપણના મિત્રો છે. જો તેઓ એકબીજા માટે સીરિયસ હોય તો તેની મને જાણ નથી'.

શ્રેષ્ઠ અને કપૂર પરિવાર મિત્રો છે. શક્તિ કપૂરે આ વિશે વાત કરતાં કહ્યું કે, 'હું રોહનના પિતા રાકેશ શ્રેષ્ઠને તેઓ ફોટોગ્રાફર બન્યા ત્યારથી ઓળખુ છું. મેં તેમની સાથે માત્ર અઢળક ફોટોશૂટ જ નથી કર્યા પરંતુ અમે સાથે બેસીને જમ્યા પણ છીએ. તેઓ મારા સારા મિત્ર છે'.

શક્તિ કપૂરે ગયા વર્ષે કહ્યું હતું કે, તેમને લાગે છે કે, શ્રદ્ધામાં ઓછામાં ઓછા 2-3 વર્ષ સુધી લગ્ન નહીં કારણ કે તે પોતાના કામમાં વ્યસ્ત છે. આ અંગે તેમણે કહ્યું કે, 'આ પણ સાચું છે પરંતુ સમયની સાથે બાળકો મોટા થઈ જાય છે અને પોતાના નિર્ણય જાતે લે છે. શ્રદ્ધા તેના કરિયરમાં સારું કરી રહી છે અને મને તેના પર ગર્વ છે. હાલ તે રણબીર કપૂર સાથે કામ કરી રહી છે. જે આજના સમયમાં મારો ફેવરિટ એક્ટર છે. રણબીર મારા દીકરા સિદ્ધાર્થનો પણ ફેવરિટ એક્ટર છે. શ્રદ્ધા તેનો જીવનસાથી જાતે પસંદ કરશે અને લગ્ન ક્યારે કરવા છે તે પણ તે જ નક્કી કરશે'.