ભાઈબીજ પર સમિષાએ ઉતારી વિયાનની આરતી, શિલ્પા શેટ્ટીએ શેર કર્યો વીડિયો

ભાઈબીજએ ભાઈ અને બહેન વચ્ચેના પવિત્ર પ્રેમનો તહેવાર છે. આ દિવસે બહેન પોતાના ભાઈને કંકુ-અક્ષતનો તિલક કરીને તેને પોતાના હાથથી પ્રેમથી જમાડતી હોય છે. ગઈકાલે (16 નવેમ્બર) આપણે ત્યાં ભાઈબીજના પર્વની ઉજવણી થઈ. પરિવાર સાથે ધામધૂમથી દરેક તહેવાર ઉજવતી શિલ્પા શેટ્ટીના ઘરે પણ ભાઈબીજની ઉજવણી થઈ.

શિલ્પા શેટ્ટીની દીકરી સમિષા અને દીકરા વિયાનની આ પહેલી ભાઈબીજ હતી. એક્ટ્રેસે આ અંગેનો વીડિયો સોશિયલ મીડિયા પર શેર કર્યો છે. જેમાં સમિષા મમ્મી શિલ્પાના ખોળામાં બેઠી છે. શિલ્પા દીકરીના બદલામાં બધી વિધિ કરી રહી છે. તે પહેલા વિયાનની આરતી ઉતારે છે અને બાદમાં સમિષા તેમજ વિયાન એકબીજાને ભેટતા જોવા મળી રહ્યા છે. વીડિયોમાં વિયાન સફેદ કૂર્તો અને પાયજામામાં જોવા મળી રહ્યો છે, જ્યારે સમિષા સફેદ આઉટફિટમાં જોવા મળી રહી છે.


વીડિયો શેર કરીને શિલ્પાએ કેપ્શનમાં લખ્યું છે કે, 'અમારા હૃદયના બે ભાગ. વિયાન-રાજ અને સમિષાએ તેમની પહેલી ભાઈબીજ ઉજવી. આજે હું કૃતજ્ઞ છું કારણ કે મારા દીકરાની નાનકડી બહેન હોય તેવી ઈચ્છા પૂરી થઈ. વિયાન આજે કેટલો ખુશ છે તે તેની સ્માઈલ પરથી જોઈ શકાય છે. આભાર'.


અગાઉ શિલ્પા શેટ્ટીએ મા લક્ષ્મીની પૂજા કરતો વીડિયો શેર કર્યો હતો. જેમાં શિલ્પાની સાથે રાજ કુંદ્રા, વિયાન, સમિષા જોવા મળ્યા હતા. સમિષાની આ પહેલી દિવાળી હતી. આ તકે તેની ફેમિલીએ લક્ષ્મી માતા સાથે દીકરીની પણ પૂજા કરી હતી. શિલ્પાએ વિડીયો સાથે કેપ્શન લખ્યું હતું કે, 'મારુ માનવું છે કે જે પરિવાર સાથે પ્રાર્થના કરે છે, તે સાથે જ રહે છે અને આ અમારા પરિવારની દર વર્ષની પ્રથા છે. અમે માતા લક્ષ્મી અને સમિષાને પ્રાર્થના કરી હતી. જેની આ પહેલી દિવાળી હતી. અમારા માટે જ નહીં પરંતુ તમારા માટે પણ આશીર્વાદ મોકલી રહી છું. માતા લક્ષ્મીની કૃપા વરસતી રહે. તમને દરેકને હેપી દિવાળી'.


આ સિવાય શિલ્પાએ વિયાન સાથે રંગોળી બનાવી રહી હોય તેવો વીડિયો પણ ઈન્સ્ટાગ્રામ પર શેર કર્યો હતો. શિલ્પાએ લખ્યું હતું કે, 'વર્ષનો સૌથી રંગબેરંગી અને સુંદર સમય આવી ગયો છે. દિવાળીના પહેલા દિવસે પરંપરા પ્રમાણે હું અને વિઆન રંગોળી બનાવી રહ્યા છીએ. આ પવિત્ર દિવસે મા લક્ષ્મીને અમારા ઘરમાં આવકારવાની આ સુંદર રીત છે. તમને સૌને ધનતેરસની શુભેચ્છાઓ. લક્ષ્મી મા અને કુબેર દેવની કૃપા હંમેશા તમારા પર રહે'.