શાઇની આહુજાને કેમ છે 'ગ્રેટ ગ્રાન્ડ મસ્તી' સામે વાંધો?

મુંબઈઃ ‘ગ્રેટ ગ્રાન્ડ મસ્તી’નાં મેકર્સને ફિલ્મની રિલીઝના એક દિવસ પહેલાં જ લીગલ નોટિસ મોકલવામાં આવી હતી. ફિલ્મમાં નોકરાણીના નામ સામે અભિનેતા શાઇની આહુજાએ વાંધો ઉઠાવી એકતા કપૂર, જિતેન્દ્ર કપૂર, ઇન્દ્ર કુમારને નોટિસ ફટકારી છે. ફિલ્મમાં એક નોકરાણીનું નામ ‘શાઇની’ છે. શાઇની આહુજાએ આ પાત્રના નામ અને તેની સાથેના રેફરન્સીસ સામે વાંધો ઉઠાવ્યો છે.

એક લીગલ ફર્મના સૂત્રના જણાવ્યાનુસાર, ફિલ્મના મેકર્સને નોટિસ મોકલવામાં આવી છે, જેમાં જણાવાયું છે કે, ફિલ્મમાં નોકરાણીનું નામ ‘શાઇની’ રાખવામાં આવ્યું છે, જે બળાત્કારના એક કેસમાં શાઇની આહુજાને અસર કરી શકે છે. આ કેસમાં કોર્ટે તેને દોષી ઠેરવી સાત વર્ષની જેલની સજા ફટકારેલી છે. 2009માં શાઇની આહુજા સામે તેની નોકરાણીએ બળાત્કારની ફરિયાદ નોંધાવી હતી. જોકે શાઇનીએ તેની સજા સામે અપીલ કરતાં તેની સુનાવણી બોમ્બે હાઈ કોર્ટમાં ચાલી રહી છે.

શાઇનીએ ફિલ્મમાંથી નોકરાણીનાં નામ અને રેફરન્સીસ સામે આપત્તિ વ્યક્ત કરી એક લીગલ ફર્મ દ્વારા બાલાજી મોશન પિક્ચર્સ અને મારુતિ ઇન્ટરનેશનલ્સને નોટિસ મોકલાવી છે. ફિલ્મ 15મી જુલાઈએ રિલીઝ થઈ છે, પરંતુ ફિલ્મની પ્રિન્ટ લીક થઈ ગઈ હોવાથી તેણે કેટલાક ભાગ જોયા હતા. ફિલ્મમાં સોનાલી રાઉતે એક નોકરાણીની ભૂમિકા ભજવી છે, જેમાં તેનું નામ શાઇની છે અને તેની સાથે અભિનેતા રિતેશ દેશમુખ, વિવેક ઓબેરોય અને આફતાબ તેની સાથે ફ્લર્ટ કરતા હોય છે.