કંગનાની 'ઈસ્લામી બોલિવૂડ' કૉમેન્ટ પર શિવસેનાનો પલટવાર, 'અહીં લોકો ટેલેન્ટની સફળ થયા'

મુંબઈ: સુશાંત સિંહ રાજપૂતના મોત બાદ બોલિવૂડમાં ચાલી રહેલા વિવાદ પર શિવસેનાએ ફિલ્મ ઈન્ડસ્ટ્રીને પૂરજોશમાં સમર્થન આપ્યું છે. શનિવારે શિવસેનાએ કહ્યં કે, ઈન્ડિયન ફિલ્મ ઈન્ડસ્ટ્રીની આધારશિલા દાદાસાહેબ ફાળકેએ મૂકી હતી. ફિલ્મ ઈન્ડસ્ટ્રીના કલાકારોએ પોતાના ટેલેન્ટના આધારે સફળતા મેળવી છે, નહીં કે ધર્મના આધારે. પાર્ટીના મુખપત્ર 'સામના'માં છપાયેલા એડિટૉરિયલમાં કંગના રનોટની તે ટ્વીટ પર નિશાન સાધવામાં આવ્યું છે જેમાં તેણે ફિલ્મ ઈન્ડસ્ટ્રીને 'ઈસ્લામના પ્રભુત્વ' વાળી કહી દીધી હતી.

અસલમાં કંગના રનોટે પોતાની એક ટ્વીટમાં કહ્યું હતું કે, તેણે 'ઈસ્લામના પ્રભુત્વ' વાળી ફિલ્મ ઈન્ડસ્ટ્રીમાં પોતાનું જીવન અને કરિયર દાવ પર લગાવ્યું અને રાણી લક્ષ્મીબાઈ અને છત્રપતિ શિવાજી મહારાજ પર ફિલ્મો બનાવી. એડિટૉરિયલમાં કહેવામાં આવ્યું કે, ફાળકે દ્વારા રાખવામાં આવેલી આધારશિલાનું ફળ આજે આખા દેશના કલાકારોને મળી રહ્યાં છે.

'મુંબઈમાં લોકો ફૂટપાથ પર ઊંઘે છે, પછી જુહૂ-પાલી હિલમાં રહેવા જતા રહે છે'

સામનામાં લખવામાં આવ્યું છે કે, 'મુંબઈમાં આ ઈન્ડસ્ટ્રીમાં જે પોતાનું ભાગ્ય અજમાવવા આવે છે તે પહેલા ફૂટપાથ પર ઊંઘે છે અને પછી જુહૂ, પાલી હિલ અને માલાબાર હિલમાં બંગલો બનાવી રહેવા જતું રહે છે. આ બધા લોકો આ શહેર અને રાજ્યના હંમેશાં આભારી રહ્યા છે જેણે તેમને તેમના સપનાં પૂર્ણ કરવાની તક આપી. તેમણે મુંબઈને ક્યારેય દગો નથી કર્યો અને શહેરના વિકાસમાં પોતાનું યોગદાન આપ્યું.'

શિવસેના બોલી, ફિલ્મ ઈન્ડસ્ટ્રીથી લાખો લોકોને મળ્યા રોજગાર

મુખપત્રમાં કહેવામાં આવ્યું છે કે, 'ઘણા બધા કલાકારોને ભારત રત્ન અને નિશાન-એ-પાકિસ્તાન'થી નવાઝવામાં આવ્યા. સંયોગની વાત છે કે, જ્યારે વર્ષો પહેલા દિલીપ કુમારે નિશાન-એ-પાકિસ્તાનનો સ્વીકાર કર્યો ત્યારે શિવસેનાએ તેમનો ખૂબ વિરોધ કર્યો હતો. એડિટૉરિયલમાં કહેવામાં આવ્યું છે કે, મુંબઈ ફિલ્મ ઈન્ડસ્ટ્રી લાખો લોકોને રોજગાર આપે છે. ઈન્ડસ્ટ્રીમાં 'ખાન્સ'ના પ્રભુત્વ પર લેખમાં કહેવામાં આવ્યું કે, એક સમયે ઈન્ડસ્ટ્રીમાં પંજાબીઓ અને મહારાષ્ટીય લોકોનું પ્રભુત્વ હતું.

ઉલ્લેખનીય છે કે, છેલ્લા કેટલાક સમયથી કંગના અને શિવસેના વચ્ચે ખાસ્સો સંઘર્ષ જોવા મળી રહ્યો છે. તાજેતરમાં BMC દ્વારા કંગનાની ઑફિસ તોડી નાખવામાં આવી ત્યારે પણ બંને પક્ષ સામ-સામે આવી ગયા હતા. કંગનાને અન્ય પાર્ટીના નેતાઓ આવીને રાજકારણમાં જોડાવાનું નિમંત્રણ પણ આપી ચૂક્યા છે.