રક્ષાબંધન પર એકલી પડી સુશાંતની બહેનો, ભાઈ સાથેની બાળપણની તસવીરો શેર કરીને કહ્યું...

બોલિવુડ એક્ટર સુશાંત સિંહ રાજપૂતનું 14 જૂનના રોજ અવસાન થયું. 4 બહેનોનો એકમાત્ર ભાઈ સુશાંત 34 વર્ષની નાની વયે આ દુનિયાને અલવિદા કહીને જતો રહ્યો. આજે રક્ષાબંધનનું પર્વ છે ત્યારે સુશાંતની બહેનો તેને ખૂબ યાદ કરી રહી છે. સોશિયલ મીડિયા પર એક્ટિવ રહેતી સુશાંતની મોટી બહેન શ્વેતા સિંહ કીર્તિએ રક્ષાબંધન પર ભાઈને યાદ કર્યો છે.

શ્વેતાએ બાળપણની રક્ષાબંધનની તસવીરોનો એક કોલાજ શેર કર્યું છે. જેમાં ચારેય બહેનો પોતાના લાડલા ભાઈને રાખડી બાંધતી અને મીઠાઈ ખવડાવતી જોવા મળે છે. એક તસવીરમાં નાનકડો ગુલશન (સુશાંતનો પરિવાર પ્રેમથી તેને ગુલશન બોલાવતો હતો) ખુરશીમાં બેઠો છે અને રાખડી બંધાવ્યા પછી મમ્મી બહેનોને પૈસા અપાવડાવી રહી છે. એક એ રક્ષાબંધન હતી ને એક આ વર્ષની રક્ષાબંધન છે જ્યાં ચારેય બહેનો ભાઈ વિના સૂની પડી ગઈ છે.


શ્વેતાએ તસવીરો શેર કરતાં લખ્યું, "મારા સ્વીટ બેબી હેપી રક્ષાબંધન...અમે તને ખૂબ પ્રેમ કરીએ છીએ અને હંમેશા કરતા રહીશું. તું અમારું ગર્વ છે, હતો અને હંમેશા રહીશ."


સુશાંત સિંહ રાજપૂત 14 જૂને બાંદ્રા સ્થિત ઘરે મૃત હાલતમાં મળ્યો હતો. આ કેસમાં સુશાંતના પિતાએ તેની ગર્લફ્રેન્ડ રિયા ચક્રવર્તી સામે પટણામાં FIR નોંધાવી છે. હાલ બિહાર પોલીસ આ મામલે તપાસ કરી રહી છે. દરમિયાન સુશાંતની બહેનો સતત પોતાના ભાઈ માટે ન્યાયની માગ કરી રહી છે. સુશાંતની બહેન શ્વેતાએ પીએમ નરેંદ્ર મોદીને બેવાર અપીલ કરી કે આ કેસમાં તેઓ ધ્યાન આપે અને ન્યાય મેળવવામાં મદદ કરે.