ફેનના ફૂડ સ્ટોલ પર પહોંચીને સોનુ સૂદે આપી સરપ્રાઈઝ, ફ્રાઈડ રાઈસનો માણ્યો સ્વાદ

બોલિવુડ એક્ટર સોનુ સૂદે કોરોના મહામારીમાં જરૂરિયાતમંદોની ખૂબ મદદ કરી છે. હવે આ રિયલ લાઈફ હીરોને લોકો દિલથી પ્રેમ કરે છે. એટલું જ નહીં ઘણા લોકો પોતાના બિઝનેસ અને બાળકોનું નામ પણ એક્ટરના નામ પરથી પાડી ચૂક્યા છે. ક્રિસમસના તહેવાર પર સોનુ પોતાના એક ચાહકના ફૂડ સ્ટોલ પર પહોંચ્યો હતો. અહીં તેણે કૂકિંગ કર્યું અને રાઈસ મંચુરિયન પણ ખાધા હતા.


શુક્રવારે એક ફૂડ સ્ટોલના માલિકને ખૂબ મોટી ભેટ મળી હતી. એક્ટર સોનુ સૂદ હૈદરાબાદમાં પોતાના એક ફેનના ફૂડ ટ્રક ખાતે પહોંચ્યો હતો. સોનુએ તેમને ક્રિસમસની શુભેચ્છા પણ પાઠવી હતી. આ સ્ટોલના માલિકે સોનુના નામ પર જ આ ફૂડ બિઝનેસ શરૂ કર્યો છે. અહીં ફ્રાઈડ રાઈસ, મંચુરિયન અને નૂડલ્સ જેવું ચાઈનીઝ ફૂડ મળે છે.


સોનુને અચાનક પોતાના ફૂડ સ્ટોલ પર આવેલો જોઈને તેના માલિક અનિલ એક્ટરના પગમાં પડી ગયા હતા. બેગમપેટ સ્થિત આ ફૂડ સ્ટોલનું નામ 'લક્ષ્મી સોનુ સૂદ ફાસ્ટ ફૂડ સેન્ટર' છે. સોનુએ આ દુકાનમાંથી ફૂડ ખાધું પણ ખરું અને કૂકિંગ પર પણ હાથ અજમાવ્યો હતો.

સોનુ સૂદે કોરોના કાળમાં જાહેર કરાયેલા લોકડાઉન દરમિયાન અનેક લોકોની મદદ કરી હતી અને હજી સુધી કરી રહ્યો છે. લોકો સોશિયલ મીડિયા અકાઉન્ટ પર સોનુ પાસે મદદ માગે છે. સોનુએ કોરોના કાળમાં બેરોજગાર થયેલા અનેક લોકોને નવું કામ શરૂ કરવામાં મદદ કરી છે. તેણે બેરોજગારો માટે એક એપ પણ લોન્ચ કરી છે. તો ઘણા લોકોના ભણતર, સારવાર અને બિઝનેસ માટે પણ એક્ટરે દિલ ખોલીને મદદ કરી છે.