સુશાંતને ડ્રગ્સના રવાડે ચડાવવાનું ષડ્યંત્ર રચાઈ રહ્યું હતું? રિયા સામે વધુ કેસ દાખલ

નવી દિલ્હીઃ એક્ટર સુશાંત સિંહ રાજપૂતના કેસની તપાસમાં એક નવો વળાંક આવ્યો છે, હવે નાર્કોટિક્સ કંટ્રોલ બ્યુરો (NCB)એ બુધવારે સાંજે ડ્રગ ડિલિંગ અને કન્ઝપ્શનના કથિત આરોપોને ધ્યાનમાં રાખીને એક્ટરની ગર્લફ્રેન્ડ રેયા ચક્રવર્તી સહિત અન્ય મિત્રો સામે ગુનો નોંધાયો છે.

જ્યારે આ વિષયમાં DG (NCB) રાકેશ અસ્થાનાનો સંપર્ક કરવામાં આવ્યો તો તેમણે જણાવ્યું કે, "આ બાબતની તપાસ માટે પ્રસ્તાવ મૂકવામાં આવ્યો છે અને પાંચ સભ્યોની SIT ટીમની રચના કરવામાં આવી છે."

સૂત્રોના જણાવ્યા પ્રમાણે આ કેસ કેટલાક પુરાવાના આધારે નોંધવામાં આવ્યો છે, જેમાં WhatsApp ચેટના સ્ક્રીનશોટ અને માગણી પત્ર ED દ્વારા NCBને મોકલાયો છે. EDના ડિરેક્ટર સંજય મિશ્રાએ રાકેશ અસ્થાનાને પત્ર લખીને આ દિશામાં તપાસ માટે જણાવ્યું છે. ED આ કેસમાં આર્થિક લેવડ-દેવડ મામલે તપાસ કરી રહી છે.

રિપોર્ટ્સમાં જણાવ્યા પ્રમાણે રિયાના વકીલ સતિશ માનશિંદે જણાવ્યું કે, "મને નવાઈ લાગે છે કે જ્યારે CBI અને ED આ કેસમાં તપાસ કરી રહ્યા છે અને હવે NCBની એન્ટ્રી થઈ છે. તેણે ઘણી વખત બ્લડ ટેસ્ટ પણ કરાવ્યો છે." આ સાથે તેમણે રિયા અને શોવિકની સહીવાળા 10 ઓગસ્ટની ચેટ વાઈરલ થઈ રહી છે તે અંગે પણ સવાલ ઉઠાવ્યા છે.

સૂત્રોના જણાવ્યા પ્રમાણે રિયાની બીજા સાથેની કેટલીક WhatsApp ચેટની વિગતો કે જેમાં ડ્રગ્સની વસૂલી અંગેની વાતચીત છે તે NCBને સોંપવામાં આવી છે. આ કેસમાં NCB દ્વારા તપાસ કરવામાં આવશે કે દિવંગત એક્ટરને તેની ગર્લફ્રેન્ડ રિયા ચક્રવર્તી દ્વારા ડ્રગ્સ જાળમાં ફસાવવાની કોશિશો થઈ રહી હતી કે કેમ?