સુશાંતની બહેનોએ કહ્યું, રિયા ચક્રવર્તીના આરોપો ઉપજાવી કાઢેલા છે, નથી બનતો કોઈ કેસ

સુશાંત સિંહ રાજપૂતની બહેનો પ્રિયંકા સિંહ અને મીતુ સિંહે કહ્યું કે, રિયા ચક્રવર્તીની એફઆઈઆર ઉપજાવી કાઢેલી છે. આ જવાબ તેમણે એ પીટિશનમાં આપ્યો છે, જેમાં તેમણે કહ્યું હતું કે, તેમની સામે કરવામાં આવેલી એફઆઈઆરને રદ કરવામાં આવે. ઉલ્લેખનીય છે કે, રિયાએ એવો આરોપ લગાવતા એફઆઈઆર નોંધાવી હતી કે, સુશાંતની બહેનોએ તેમના ભાઈ માટે 'ખોટું પ્રિસ્ક્રિપ્શન' બનાવડાવ્યું હતું.

રિયાના આરોપો પર હવે બંને બંહોનએ એક સાથે માગ કરી છે કે, રિયાની તપાસ કરવામાં આવે. પ્રિયંકા અને મીતુએ હાઈકોર્ટમાં અપીલ કરી છે કે, બાંદ્રા પોલીસ સ્ટેશનમાં રિયાના કહેવા પર જે ફરિયાદ નોંધાઈ છે, તે ઉપજાવી કાઢેલી વાર્તા છે અને આરોપ પાયાવિહોણા છે. એ એફઆઈઆરના આધાર પર તેમના પર કોઈ કેસ બનતો નથી.

તેમણે કહ્યું કે, તેમની સામે રિયા ચક્રવર્તીએ જે ફરિયાદ નોંધાવીછે તેમાં જે તથ્યો રજૂ કરાયા છે, તે બધા ભ્રામક છે. તેમણે કહ્યું કે, રિયા તેમની સાથે બદલો લેવા ઈચ્છે છે અને સાથે જ વ્યક્તિગત રીતે ખોટા આરોપ લગાવી તેમને પરેશાન કરવા ઈચ્છે છે.

બંને બહેનોએ કહ્યું કે, રિયાએ જાણીજોઈને એ લેટર છૂપાવ્યો, જે તેમણે પોતે 14 સપ્ટેમ્બરે પોલીસને લખ્યો હતો. તેમાં તેમણે સ્વીકાર્યું હતું કે, સેક્શન 306 અંતર્ગત એફઆઈઆર નોંધી શકાય નહીં.

બાંદ્રા પોલીસ સ્ટેશને 7 સપ્ટેમ્બરે એફઆઈઆર નોંધી હતી કે, આરોપી બહેનો અને ડો તરુણ કુમારે ષડયંત્ર, છેતરપિંડી અને કપટથી સુશાંત માટે 8 જૂને 'ખોટું પ્રિસ્ક્રિપ્શન' બનાવ્યું. પોલીસ મુજબ, હવે સીબીઆઈ બંને એફઆઈઆરની તપાસ કરશે.