યૌન શોષણના આરોપો લાગવા છતાં કેમ અનુરાગ કશ્યપની પડખે ઊભી છે તાપસી? જણાવ્યું કારણ

મુંબઈ મિરરને આપેલા ઈન્ટરવ્યૂમાં તાપસીએ અનુરાગનો સાથ આપવા અંગે કહ્યું, 'અનુરાગ મહિલાઓને ખૂબ માન આપે છે. અનુરાગે ક્યારેય પોતાના વિશે જાહેરમાં ખરાબ બોલનારા લોકોની નિંદા કરી નથી. અનુરાગની ફિલ્મોના સેટ એ જૂજ પૈકીના એક છે જ્યાં મહિલાઓ પણ પુરુષો જેટલી જ સમાનતાથી કામ કરે છે. સેટ પર કોઈને પણ પૂછો કોઈ અનુરાગ વિશે એક શબ્દ ખરાબ નહીં કહે, તેના વખાણ કરશે.'

યૌન શોષણના કેસ વિશે વાત કરતાં તાપસી પન્નુએ જણાવ્યું, "જો કોઈની સાથે ખરાબ વર્તન થયું હોય તો તપાસ શરૂ થવા દો, સત્ય બહાર આવી જશે. જો અનુરાગ દોષિત સાબિત થશે તો હું પહેલી વ્યક્તિ હોઈશ જે તેની સાથેના તમામ સંબંધો કાપી નાખશે." તાપસીએ એમ પણ કહ્યું કે, #MeToo મૂવમેન્ટનો ગેરલાભ કેટલીક મહિલાઓ ઉઠાવે છે, જે ખોટું છે. સતામણી કોઈ એક જાતિની થતી હોય તેવું જરૂરી નથી.

વાંચો, અનુરાગ કશ્યપ પર લાગેલા આરોપો પર પહેલી પત્નીની પ્રતિક્રિયા

યૌન શોષણના આરોપ લાગ્યા બાદ તાપસી પન્નુએ અનુરાગ કશ્યપ માટે એક પોસ્ટ મૂકી હતી. અનુરાગ સાથેની મોનોક્રોમ તસવીર શેર કરીને તાપસીએ લખ્યું હતું, "તારા માટે મારા મિત્ર, હું ઓળખું છું તેમાંથી તું સૌથી મોટો ફેમિનિસ્ટ (નારીવાદી) છે. તારા એક નવા આર્ટ પીસ સાથે ફિલ્મના સેટ પર જલદી જ મુલાકાત કરીશું. તારી કળા દ્વારા તું દર્શાવે છે કે, તારી બનાવેલી દુનિયામાં મહિલાઓ કેટલી શક્તિશાળી અને સાર્થક હોય છે." જણાવી દઈએ કે, તાપસીએ 'મનમર્ઝિયા' અને 'સાંડ કી આંખ' ફિલ્મમાં અનુરાગ કશ્યપ સાથે કામ કર્યું હતું.

આ પણ વાંચો, અનુરાગની બીજી પત્ની કલ્કીએ પણ તેના સમર્થનમાં કહી હતી આ વાત

એક્ટ્રેસ પાયલ ઘોષે સોશિયલ મીડિયાના માધ્યમથી અનુરાગ કશ્યપ પર યૌન શોષણનો આરોપ લગાવ્યો હતો. પાયલ ઘોષનો દાવો છે કે, 2015માં અનુરાગે તેની સાથે જબરદસ્તી કરવાની કોશિશ કરી હતી. મુંબઈના વર્સોવા પોલીસ સ્ટેશનમાં પાયલ ઘોષે અનુરાગ કશ્યપ સામે ફરિયાદ નોંધાવી છે. પાયલના વકીલે નિવેદન આપતા કહ્યું, "IPCની કલમ 376, 354, 341 અને 342 હેઠળ લેખિત ફરિયાદ નોંધાવવામાં આવી છે. પીડિતાનું સ્ટેટમેન્ટ પણ નોંધાવાયું છે." તો આ તરફ અનુરાગ કશ્યપે પોતાના પર લાગેલા તમામ આરોપોને પાયાવિહોણા ગણાવ્યા છે.