વરુણ-નતાશા લગ્નઃ ચકલું પણ ફરકી ન શકે તેવી જડબેસલાક વ્યવસ્થા, ખૂણે-ખૂણાંમાં CCTVની નજર

અભિનેતા વરૂણ ધવન અને તેની લાંબા સમયની ગર્લફ્રેન્ડ નતાશા દલાલના લગ્નને લઈને બોલિવૂડ ઇન્ડસ્ટ્રીમાં ચર્ચા જામી છે. બી-ટાઉનમાં 2021ના આ પહેલું લગ્ન હશે જેના પર દરેકની નજર રહેશે. વરૂણ ધવન અને નતાશા દલાલ 24 જાન્યુઆરી એટલે કે રવિવારે લગ્ન કરશે. લગ્ન સમારોહની શરૂઆત 23 જાન્યુઆરી સંગીત સેરેમનીથી થશે. આ લગ્ન અંગે તમામ સુરક્ષા વ્યવસ્થા કરવામાં આવી છે જેથી પ્રાઈવસીમાં કોઈપણ રીતે દખલ ન આવી શકે. લગ્ન સ્થળની આસપાસ મોટી સંખ્યામાં સિક્યુરિટી ગાર્ડ તૈનાત કરવામાં આવ્યા છે. તો સમગ્ર સ્થળ સીસીટીવી કેમેરાથી પણ સજ્જ છે.


એક્ટરના પરિવારના કર્મચારીઓને ફોનનો ઉપયોગ ન કરવા સૂચના
વરૂણ ધવન અને નતાશા દલાલના લગ્ન સ્થળને ફ્લેક્સ બોર્ડથી ઢાંકવામાં આવ્યું છે. જેથી લગ્ન દરમિયાન કોઈ બહારના વ્યક્તિ ફોટો ક્લિક ન કરી શકે. તો, એક્ટર વરુણના પિતા ડેવિડ ધવન, માતા લાલી ધવન, ભાઈ રોહિત ધવન અને ભાભી જ્હાનવી ધવન બપોરે લગ્ન સ્થળે જતા જોવા મળ્યાં છે. હાલ તો વરૂણ ધવન લગ્નના સ્થળે આવવાનો બાકી છે. એક્ટરના પરિવારના કર્મચારીઓને ફોનનો ઉપયોગ ન કરવા માટે પણ જણાવાયું છે.

આલિશાન રિઝોર્ટ બુક, આવી શકે છે આ સેલેબ્સ
વરૂણ ધવન અને નતાશા દલાલના લગ્નમાં કોવિડને કારણે લગ્નમાં ફક્ત નજીકના લોકો જ હાજરી આપશે. તો બોલિવૂડના એ-લિસ્ટના સ્ટાર્સ હાજરી આપશે તેવી શક્યતા છે. સલમાન ખાન, કેટરિના કૈફ, કરણ જોહર, શ્રદ્ધા કપૂર, મનીષ મલ્હોત્રા અને જેકલીન ફર્નાન્ડિઝ હાજર રહેશે તેવા રિપોર્ટ છે તો લગ્ન માટે લક્ઝરી રિઝોર્ટ મેન્શન હાઉસ બુક કરવામાં આવ્યું છે. જે એક એકરમાં ફેલાયેલું છે. રિપોર્ટ અનુસાર, તેમાં 25 રુમ, સ્વિમિંગ પૂલ અને ગાર્ડન એરિયા સહિતની ઘણી સુવિધાઓ છે.