વરુણ-નતાશાના રોકાની તસવીરો, ફંક્શન દરમિયાન ચહેરા પરથી નહોતું હટી રહ્યું સ્મિત

વરુણ ધવન અને નતાશા દલાલના લગ્ન અલીબાગના એક રિસોર્ટમાં એકદમ પ્રાઈવેટ રાખવામાં આવ્યા હતા. અંદરથી તસવીરો અને વીડિયો વાયરલ ન થાય તે માટે મહેમાનો પાસેથી તેમના મોબાઈલ પણ લઈ લેવામાં આવ્યા હતા. તેમજ રિસોર્ટની ચારેબાજુ સીસીટીવી કેમેરા પણ લગાવવામાં આવ્યા હતા. ફેન્સ શરુઆતથી જ બંનેના લગ્નની તસવીરો જોવા માટે આતુર હતા. જો કે, હવે વેડિંગ સેલિબ્રેશનથી લઈને પ્રી-વેડિંગ ફંક્શનની અંદરની તસવીરો ધીમે-ધીમે સામે આવી રહી છે. પહેલા લગ્ન, બાદમાં લગ્ન પછી થયેલી પાર્ટી, મહેંદી સેરેમની અને સંગીત સેરેમની બાદ હવે વરુણ-નતાશાની રોકા સેરેમનીની તસવીરો સામે આવી છે.


એકબીજાના પ્રેમમાં ખોવાયેલા અને જીવનના નવા તબક્કાને માણવા માટે આતુર તેવા વરુણ-નતાશાના ચહેરા પરથી સેરેમની દરમિયાન સ્મિત હટી રહ્યું નહોતું. રોકા સેરેમનીમાં નતાશા સાડી અને રુબી-ડાયમંડનો નેકલેસ પહેર્યો હતો. જ્યારે વરુણે બ્લૂ શર્ટ અને બ્લેક બ્લેઝર પહેર્યું હતું, જે બાદમાં તેણે કાઢી નાખ્યું હતું.


એક દિવસ પહેલા વરુણે તેમની મહેંદી સેરેમનીની તસવીરો શેર કરી હતી. જેમાં વરુણ નતાશાના ગાલ પર ચૂમી આપતો જોવા મળ્યો હતો. ઉલ્લેખનીય છે કે, વરુણ અને નતાશાના લગ્નમાં માત્ર પરિવારજનો અને ખાસ મિત્રોને જ આમંત્રણ આપવામાં આવ્યું હતું. જેમાં કરણ જોહર, શશાંક ખેતાન અને ફેશન ડિઝાઈનર મનિષ મલ્હોત્રાનો સમાવેશ થાય છે.


નતાશાને મેકઅપ આર્ટિસ્ટ લગ્ન પહેલા તૈયાર કરી રહી હોય તેવો વીડિયો સોશિયલ મીડિયામાં વાયરલ થયો છે. જેમાં નતાશા મેકઅપ વગર જોવા મળી રહી છે. નતાશાની મેકઅપ આર્ટિસ્ટ નમ્રતા સોનીએ જણાવ્યું કે, તેણે દુલ્હન નતાશાને માત્ર 35 મિનિટમાં તૈયાર કરી હતી. તેણે કહ્યું કે, નતાશા યંગ છે અને તેથી તે તેના ચહેરા પર મેકઅપના વધારે લેયર્સ લગાવવા નહોતી માગતી.


નતાશા સિવાય વરુણનો પણ લગ્ન માટે તૈયાર થતો હોય તેવો વીડિયો સામે આવ્યો છે. જેમાં નતાશાને પોતાની દુલ્હનિયા બનાવવાની ખુશી તેના ચહેરા પર દેખાઈ રહી છે. લગ્નમાં વરુણે હેવી એબ્રોઈડરી કરેલી શેરવાની પહેરી હતી અને તે પહેરવામાં મનિષ મલ્હોત્રાએ તેને મદદ કરી હતી.


વરુણ અને નતાશા મંગળવારે જ અલીબાગથી મુંબઈ પોતાના ઘરે પરત ફર્યા હતા. મીડિયા રિપોર્ટ પ્રમાણે નવદંપતી હનીમૂન માટે તુર્કીના ઈસ્તાંબુલના સુંદર અને લક્ઝૂરિયસ શીરોન પેલેસ જવાના છે.