ઉત્તરાયણ પર રજૂ થયું સચિન-જીગર અને ઈશાની દવેનું 'પેચ લડાવી દઉં', જોવા મળી લવ કેમિસ્ટ્રી

અમદાવાદઃ 'બોલ વાલમ ના', 'કિટ્ટા બુચ્ચા', 'ગુલાબી' જેવા સુપરહિટ ગીતો આપીને ફેન્સના દિલમાં સ્થાન બનાવનાર ગુજરાતી સિંગર ઈશાની દવે અને બોલિવૂડ-ગુજરાતી સંગીતકાર સચિન-જીગરની જોડી સાથે લઈને આવ્યાં છે 'પેચ લડાવી દઉં'. આ વર્ષના પહેલા તહેવાર એટલે કે મકરસંક્રાતિ માટેનું આ સ્પેશ્યિલ ગીતમાં મીઠી મધૂરી લવસ્ટોરી જોવા મળશે.

જોવા મળશે લવ કેમિસ્ટ્રી
"પેચ લડાવી દઉં"માં પરીક્ષિત તમાલિયા અને ઈશાની દવેની લવ કેમેસ્ટ્રી જોવા મળશે. આ સાથે જ તમને અમદાવાદની પોળની ઉત્તરાયણ પણ જોવા મળશે. આ ગીતનું મ્યુઝિક બોલિવૂડ મ્યુઝિક ડિરેક્ટર સચિન જીગર દ્વારા આપવામાં આવ્યું છે. જ્યારે ગીતના શબ્દો ભાર્ગવ પુરોહિત દ્વારા લખવામાં આવ્યા છે અને પ્રતિક જાદવ એ ડિરેક્ટ કર્યું છે. ઈશાની દવેએ વાતચીત કરતાં જણાવ્યું હતું કે, 'આ ગીત ગત વર્ષે સચિન જીગર સાથે મળીને બનાવ્યું પરંતુ ગીતનું શૂટિંગ થઈ શક્યુ ન હતુ જેથી અમે આ આલ્બમ રિલીઝ કરી શક્યા ન હતા. ત્યારબાદ અમે ડિસેમ્બરમાં નક્કી કર્યું કે આ ગીતને આ વર્ષે બનાવીએ અને અમે તૈયારીઓ શરૂ કરી દીધી.


અમદાવાદની પોળમાં થયું છે શૂટિંગ
આ ગીતમાં તમને અમદાવાદના પોળની ઉત્તરાયણ જોવા મળશે. જો કે અમદાવાદની પોળની ઉત્તરાયણ દુનિયાભરમાં ખૂબ વખણાય છે. અને ત્યાં તેમનુ મહત્વ પણ વધુ અને વિશેષ છે. જેથી અમે આ ગીતનું સમગ્ર શૂટિંગ અમદાવાદની પોળમાં અંબાપુરની વાવમાં કર્યું છે. જેથી આ ગીતમાં તમને અમદાવાદની પોળની ઉત્તરાયણ અને એક મજાની લવ સ્ટોરી જોવા મળશે. આ ગીતમાં પરીક્ષિત તમાલિયા પણ જોવા મળશે જેમણે 'સાહેબ', 'દુનિયાદારી' જેવી ઘણી ગુજરાતી ફિલ્મ્સમાં પણ કામ કર્યું છે.

"પેચ લડાવી દઉં"માં મળશે બોલિવૂડ ફીલ
"પેચ લડાવી દઉં" ગીતને એકદમ ગુજરાતી અને બોલિવૂડ ફિલમાં બનાવ્યું છે. જેથી કોઈ ગુજરાત બહારની વ્યક્તિ સાંભળશે તો તેમને પણ પસંદ પડે તેવુ સચિન જીગર દ્વારા મ્યુઝિક આપવામાં આવ્યું છે. આ ગીત ઉત્તરાયણ પહેલા જ રીલિઝ થઈ ગયું છે. જેથી આ વર્ષે કોરોના જેવી મહામારીને કારણે હજુ ઉત્તરાયણ લઈને એવો કોઈ ખાસ ઉત્સાહ જોવા મળતો નથી.
આ ગીત 8 જાન્યુઆરીએ રીલિઝ થઈ ગયું છે.