મૂવી રિવ્યુઃ પંગા

“હું એક માં છું અને માંના કોઈ સપના નથી હોતા.” અશ્વિની ઐયર તિવારી નિર્દેશિત ‘પંગા’ના આ ડાયલોગ સાથે ઘર-પરિવાર અને બાળકો માટે પોતાની જાતને ભૂલાવી દેનાર દરેક મહિલા પોતાની જાતને સાંકળી શકશે. ફિલ્મમાં વધુ એક સંવાદ આવે છે જેમાં હીરોઈન પોતાના પતિને કહે છે, “તને જોઉં છું તો બહુ ખુશી થાય છે, આને (દીકરા)ને જોઉં છું તો ખુશી થાય છે પણ મારી જાતને જોઉં છું તો ખુશ નથી થઈ શકતી.” ત્યાર પછી શરૂ થાય છે હીરોઈનની અસ્તિત્વની જંગ અને તેમાં પોતાને શ્રેષ્ઠ સાબિત કરવાની મથામણ.હવે ટેલિગ્રામ પર મેળવો દરેક મહત્વના સમાચાર, શરૂ કરવા અહીં ક્લિક કરોજયા નિગમ (કંગના રણૌત) એક સમયે કબડ્ડીની નેશનલ પ્લેયર અને કેપ્ટન રહી ચૂકી હોય છે. હવે તે ફક્ત 7 વર્ષના પુત્ર આદિત્ય (યજ્ઞ ભસીન)ની માતા અને પ્રશાંત (જસ્સી ગિલ)ની પત્ની છે. જયા પોતાની નાનકડી દુનિયામાં ખુશ છે. કબડ્ડીએ તેને રેલવેની નોકરી અપાવી છે અને તેનું જીવન ઘર, બાળકો અને નોકરીની જવાબદારીઓ વચ્ચે ગુજરી રહ્યું છે. પછી એક દિવસ ઘરમાં એવી ઘટના ઘટે છે કે જયાનો દીકરો આદિ તેને 32 વર્ષની ઉંમરે કબડ્ડીમાં કમબેક કરવા માટે પ્રેરણા આપે છે. પહેલા તો જયા પતિ પ્રશાંત સાથે મળીને કમબેકની પ્રેક્ટિસનું નાટક કરે છે પરંતુ આ પ્રક્રિયામાં તેના સપના ફરી માથુ ઊંચકે છે. તે હવે ખરેખર ઈન્ડિયાની નેશનલ ટીમમાં કમબેક કરીને પોતાના સુવર્ણકાળને ફરી જીવવા માંગે છે. આ સફરમાં તેનો પતિ અને પુત્ર તો સાથે છે જ પરંતુ તેની માતા (નીના ગુપ્તા), બેસ્ટ ફ્રેન્ડ મીનુ (રિચા ચઢ્ઢા) જે કબડ્ડી કોચ અને પ્લેયર છે તે પણ સાથ આપે છે.ડિરેક્ટર તરીકે અશ્વિની ઐયર તિવારીની ખૂબી એ છે કે તેમણે ભોપાલ જેવા નાના શહેરની નોકરી કરતી મહિલા અને તેના માધ્યમથી મધ્યમ વર્ગના પરિવારને પડદા પર જે બારીકીઓ સાથે દર્શાવી છે તે ફિલ્મની સ્ટોરીને બળ આપે છે. અશ્વિની જયા, મીનૂ અને માતા નીના ગુપ્તાના પાત્રો થકી મહિલા સશક્તિકરણની વાત કરે છે પરંતુ તેમાં ક્યાંય તે ઉપદેશ આપતા હોય એવું નથી લાગતું. ઈન્ફેક્ટ એક દૃશ્યમાં તો જયા કહે છે, “દરેક વખતે મહિલાને એવું કેમ પૂછવામાં આવે છે કે તેને કારકિર્દી છોડવા પતિ કે ઘરે મજબૂર કરી. આ તેની પોતાની પણ ચોઈસ હોઈ શકે છે.” અસલમાં અશ્વિની ‘પંગા’ના માધ્યમથી કહેવા માંગે છે કે દરેક સ્ત્રીને પોતાની ચોઈસથી પંગો લેવાનો અધિકાર આપવામાં આવવો જોઈએ.ફિલ્મનો ફર્સ્ટ હાફ થોડો લાંબો છે પણ સેકન્ડ હાફમાં સ્ટોરી પોતાની મંઝિલ તરફ ફટાફટ દોડે છે. અશ્વિનીએ સંબંધોને ગૂંથીને કબડ્ડી જેવી રમતમાં પણ થ્રિલ જાળવી રાખ્યું છે. નિખિલ મલ્હોત્રા અને અશ્વિની ઐયર તિવારીના લખેલા સંવાદ એકદમ ચોટદાર છે. જય પટેલની સિનેમેટોગ્રાફી પણ વખાણવાલાયક છે. બલ્લૂ સલૂજાએ ફિલ્મનું ધારદાર એડિટિંગ કર્યું છે. શંકર-અહેસાન-લોયનું સંગીત વિષયને અનુરૂપ છે.પરફોર્મન્સની વાત કરીએ તો કંગના રણૌતે જયા નિગમના પાત્રને એકદમ એફર્ટલેસ અને ફ્લોલેસ રીતે ભજવ્યું છે. તેના કપડા હોય કે બોડી લેંગ્વેજ, બધું જ તેના પાત્રમાં એકદમ પરફેક્ટ રીતે ઢળી જાય છે. ઈમોશનલ દૃશ્યોમાં કંગના મેલોડ્રામા કરવાને બદલે એ રીતે એક્ટિંગ કરે છે કે દર્શકોની આંખો ભીની થયા વિના નથી રહેતી. હાઉસ વાઈફ અને કબડ્ડી પ્લેયર બંને કિરદારોને તેણે પૂરો ન્યાય કર્યો છે. રિચા ચઢ્ઢાનું પાત્ર બિહારી લઢણમાં ડાયલોગ બોલીને દર્શકોનું ખૂબ મનોરંજન કરે છે. તેના અને કંગના વચ્ચે સારી કેમિસ્ટ્રી જામે છે. સહયોગી પતિની ભૂમિકામાં જસ્સી ગિલે સહજ અભિનય કર્યો છે. કંગનાની સાથે તેની જોડી સારી લાગે છે. નીના ગુપ્તાને લિમિટેડ દૃશ્યો મળ્યા છે આમ છતાં તે દર્શકો પર પોતાની છાપ છોડી જાય છે. બાળ કલાકાર યજ્ઞ ભસીન ફિલ્મનું આકર્ષણ બની જાય છે. પોતાના માસૂમ અભિનયથી તે બધાનું મન મોહી લે છે.આ ફિલ્મને મિસ ન કરશો, તે તમને તમારા સપના ફરી જીવવાની પ્રેરણા આપશે. અમારા તરફથી ફિલ્મને 4 સ્ટાર્સ.