Bhaukaal 2 Review: મોહિત રૈનાની આ ક્રાઈમ સીરિઝ જોવા જેવી છે કે નહીં?

એક્ટર- મોહિત રૈના, બિદિતા બાગ, સિદ્ધાંત કપૂર, રશ્મિ રાજપૂત, પ્રદીપ નાગર ગજ્જર, બિક્રમાજીત કંવરપાલ
ડિરેક્ટર- જતિન સતિષ વાગલે
શ્રેણી- એક્શન, ક્રાઈમ
રેટિંગ- 3/5

વાર્તા

ભૌકાલની પ્રથમ સીઝનનો જ્યાં અંત આવ્યો હતો ત્યાંથી જ બીજી સીઝનની શરુઆત થાય છે. આઈપીએસ ઓફિસર નવીન સિખેરા(મોહિત રૈના) શૌકીન નામના એક ગેન્ગ લીડરને હુસૈનપુરથી દૂર કરે છે અને હવે તેના નિશાન પર દેઢા ભાઈઓની ગેંગ છે. ક્રાઈમ કેપિટલ તરીકે ઓળખાતા મુઝફ્ફરનગરના માથેથી આ કલંક દૂર કરવામાં આઈપીએસ ઓફિસર નવીન સફળ થશે કે કેમ તે આ સીરિઝની વાર્તા છે.

રિવ્યૂ

હરમન બાવેજા, વિકી બહરી અને રાહુલ પ્રકાશ દ્વારા પ્રોડ્યુસ કરવામાં આવેલી ભૌકાલ સીરિઝ સત્ય ઘટનાઓ પર આધારિત છે. ઉત્તરપ્રદેશની અનેક અસામાજિત તત્વો ધરાવતી આ પ્રકારની ગેન્ગનો ખાતમો કરનાર અને સુપર કોપ તરીકે ઓળખાતા આઈપીએસ ઓફિસર નવનિત સેકેરાની કામગીરીને આ સીરિઝમાં દર્શાવવામાં આવી છે. પ્રદેશને પોતાના નિયંત્રણમાં લેવા માંગતા ક્રિમિનલ અને પોલીસની સ્ટોરીમાં ચોક્કસપણે તમને ગેન્ગ વોર, કિડનેપિંગ, મારપીટ, હત્યા, ગાળો, બંદૂકો, હથિયારો જોવા મળશે. ભૌકલ 2માં પ્રથમ ભાગની સરખામણીમાં આ બધું વધારે પ્રમાણમાં જોવા મળશે.

સીઝન 1ના અંતમાં આપણે જોયું કે ગેન્ગ લીડર શૌકીનનું મૃત્યુ થઈ જાય છે. ત્યાર પછી તેની ગર્લફ્રેન્ડ નાઝનીન(બિદિતા બાગ), ધારાસભ્ય અસલમ રાણા(દિવંગત મેજર બિક્રમજીત કંવરપાલ) દેઢા બ્રદર્સ સાથે જોડાઈ જાય છે. દેઢા બ્રધર્સ એટલે પિન્ટુ(પ્રદીપ નાગર) અને ચિન્ટુ(સિદ્ધાંત કપૂર). આ ક્રાઈમ સીરિઝ જય શીલા બંસલ અને આકાશ મોહિમેને ડિરેક્ટર જતિન વાગલે સાથે મળીને લખી છે. આ ત્રિપુટીએ દર્શાવવાનો પ્રયત્ન કર્યો છે કે માફિયાઓની ગેન્ગ કામ કેવી રીતે કરે છે, રાજકીય નેતાઓ પોતાના લાભ માટે તેમનો કેવી રીતે લાભ ઉઠાવે છે, પોલીસની કામગીરી શું હોય છે અને કેવી રીતે પ્રોટોકોલના કારણે પોલીસના હાથ બંધાઈ જતા હોય છે.

જો તમને પ્રથમ સીઝન પસંદ આવી હશે તો બીજી પણ ગમશે. જો કે તમને સીઝન થોડી ધીમી લાગશે. પોલીસ અને માફિયાઓ વચ્ચે થતી લડાઈ એક સમય પછી તમને કંટાળાજનક લાગી શકે છે. છઠ્ઠા એપિસોડ સુધી એક્શન સીન્સ પણ જોવા નહીં મળે. જો કે કપ્તાન નવીન સાથે તમને ચોક્કસપણે સહાનુભૂતિ થશે. ઓફિસર નવીન પોતાની નજર સમક્ષ લોકોને મરતા નથી જોઈ શકતો. ગુનેગારો પોલીસ કરતા એક પગલું આગળ હોય છે, જેના કારણે નવીન હતાશ થઈ જાય છે. જો કે અંતમાં જ્યારે ગુંડાઓ અને પોલીસનો આમનો સામનો થાય છે તો તે સીન જોવાલાયક હોય છે.

ઉત્તરપ્રદેશના નાના શહેરો, ત્યાંની રાજનીતિ, માફિયાઓની સ્ટોરી, વગેરેને કારણે સ્ટોરી વાસ્તવિક લાગે છે. ડીઓપી સુમિતની સિનેમેટોગ્રાફી ઘણી સારી છે. ડાયલોગમાં ગાળોનો ભરપૂર ઉપયોગ કરવામાં આવ્યો છે. લગભગ દરેક વાક્ય ગાળથી શરુ થાય છે અને તેનાથી જ પૂરું થાય છે. સુપર કોપ નવીન સિખેરાના રોલમાં મોહિત રૈનાએ સારું કામ કર્યું છે. પરંતુ તે આ રોલને યાદગાર બનાવવામાં સફળ સાબિત નથી થયો. નવીનની પત્ની પૂજાના રોલમાં રશ્મિ રાજપૂત જોવા મળે છે, જે નવીનનું પ્રોત્સાહન વધારે છે. નવીનની એન્કાઉન્ટર સ્પેશિયાલિસ્ટ ટીમ ભાટી(દિગંબર પ્રસાદ), બલરામ(ફિરોઝ ખાન), વિનોદ(અમિત સિંહ), મારુતિ(રવિશંકર પાંડે), પવન(રોહન વર્મા) તેને મિશનને સફળ કરવામાં મદદ કરે છે.

દેઢા બંધુઓના રોલમાં પ્રદીપ નાગર અને સિદ્ધાંત કપૂરે સારો અભિનય કર્યો છે. તેમનો એકમાત્ર ઉદ્દેશ મુઝફ્ફરનગરને પોતાના કંટ્રોલમાં લેવાનો છે. તેમનો નારો છો- ભૌકાલ મચા દો. આ માટે તેમણે કોઈ મર્યાદા નથી બાંધી, તેઓ કોઈ પણ ભોગે શહેર પર રાજ કરવા માંગે છે. પુરુષોના વર્ચસ્વ વાળા માફિયા બિઝનસમાં બિદિતા બાગે નાઝઝીનનો રોલ સારી રીતે ભજવ્યો છે. સીરિઝા પ્રથમ સીનથી જ તેની સ્ક્રીન પ્રેઝન્સ જોવા મળે છે. એમપી અસલમ રાણાના રોલમાં દિવંગત અભિનેતા મેજર બિક્રમજીત જામે છે. ક્રાઈમ જર્નાલિસ્ટ નેહાના રોલમાં ગુલકી જોશીનો રોલ પણ મહત્વનો છે.

Yeh kaali kaali ankhein review: કેવી છે તાહિર-શ્વેતાની થ્રિલર વેબ સીરિઝ?
પ્રથમ સીઝનની જેમ આ સીઝન પણ પ્રેડિક્ટેબલ છે. આગળ શું થવાનું છે તે તમને સરળતાથી ખબર પડી શકે છે. આ સીરિઝ 10 એપિસોડની છે. ઉલ્લેખનીય છે કે આ પ્રકારની અન્ય વેબ સીરિઝ જેમ કે અસુર, મિરઝાપુર આપણે જોઈ છે. પરંતુ ભૌકાલ 2માં સત્ય ઘટનાઓને દર્શાવવામાં આવી છે તે એક નવી વાત છે.જો તમે મોહિત રૈનાના ફેન છો અને તમને ક્રાઈમ ડ્રામા પસંદ છે તો આ સીરિઝ ચોક્કસપણે જોવી જોઈએ.