ખતરોં કે ખિલાડી 13માં દેખાશે ઐશ્વર્યા
અમારા સહયોગી ઈટાઈમ્સ ટીવીએ આ મુદ્દે ઐશ્વર્યા સાથે વાત કરવાનો પ્રયાસ કર્યો હતો પરંતુ સંપર્ક નહોતો થઈ શક્યો. જોકે, 'ખતરોં કે ખિલાડી 13' સાથે સંકળાયેલા સૂત્રોએ જણાવ્યું કે, "હા, ખતરોં કે ખિલાડી માટે ઐશ્વર્યાનો સંપર્ક કરવામાં આવ્યો છે. વાતચીત એડવાન્સ સ્ટેજ સુધી પહોંચી ગઈ છે અને લગભગ તેનું નામ નક્કી જ છે. જલ્દી જ તે શો સત્તાવાર રીતે સાઈન કરી દેશે."
અઢી વર્ષ પછી છોડ્યો શો
અગાઉ ઈટાઈમ્સ ટીવી સાથે વાત કરતાં ઐશ્વર્યાએ 'ગુમ હૈ કિસી કે પ્યાર મેં' છોડવા અંગે કહ્યું હતું કે, "બધી જ સારી વસ્તુઓનો ક્યારેક તો અંત આવે જ છે અને આ શો સાથેની મારી જર્ની પણ પૂરી થઈ છે. પાખીની જર્ની પૂરી થઈ છે પણ ઐશ્વર્યા તેની સાથે યાદોનો ખજાનો લઈને જઈ રહી છે કારણકે આ શોએ મને બધું જ આપ્યું છે. હું કાયમ 'ગુમ હૈ કિસી કે પ્યાર મેં'ની ઋણી રહીશ. મેં કલ્પના પણ નહોતી કરી કે આ શો થકી મને આટલું બધું મળશે. મને લાગે છે કે, હવે નવી તક શોધવાનો સમય આવી ગયો છે."
નીલ સાથે કામ કરવાનું મિસ કરશે
'ગુમ હૈ કિસી કે પ્યાર મેં'ના સેટ પર સૌથી વધુ શું મિસ કરશે? આ સવાલના જવાબમાં ઐશ્વર્યાએ પતિ નીલ ભટ્ટ સાથે કામ કરવાનું મિસ કરશે તેમ કહ્યું હતું. "મારા ફેવરિટ કો-એક્ટર અને પતિ નીલ ભટ્ટ સાથે કામ કરવાનું સૌથી વધુ મિસ કરીશ. ખબર નહીં હવે ફરીથી એની સાથે ક્યારે કામ કરવા મળશે. કો-એક્ટર્સ તરીકે અમારી વચ્ચે ખૂબ સારી સમજણ હતી. આ શો મારા માટે જ બન્યો હતો કારણકે મને મારા જીવનની સૌથી કિંમતી વસ્તુ- મારો જીવનસાથી નીલ મળ્યો છે. હું મારા શોના પ્રોડ્યુસરો અને યુનિટની આભારી રહીશ."
નવેમ્બર 2021માં કર્યા લગ્ન
ઉલ્લેખનીય છે કે, નીલ ભટ્ટ અને ઐશ્વર્યા શર્માની પહેલી મુલાકાત 'ગુમ હૈ કિસી કે પ્યાર મેં'ના સેટ પર જ થઈ હતી. ધીમે-ધીમે બંને પ્રેમમાં પડ્યા હતા. ઐશ્વર્યા અને નીલે નવેમ્બર 2021માં લગ્ન કર્યા હતા.