રિયલ લાઈફથી અલગ છે 'અનુપમા'નું જીવન, કહ્યું 'મારો પતિ ક્યારેય વિશ્વાસઘાત કરે નહીં'

'સંજીવની' અને 'સારાભાઈ vs સારાભાઈ' જેવા શોનો ભાગ રહી ચૂકેલી એક્ટ્રેસ રુપાલી ગાંગુલી હાલ 'અનુપમા'માં લીડ રોલ પ્લે કરી રહી છે. શોમાં, તેના પતિ વનરાજનો રોલ સુધાંશુ પાંડે પ્લે કરી રહ્યો છે, જે તેની સાથે વિશ્વાસઘાત કરે છે. ઘણીવાર એક્ટર્સ ઓનસ્ક્રીન કેરેક્ટર્સ સાથે રિલેટ કરતાં હોય છે, ત્યારે રુપાલીનું હાલના ટ્રેક અંગે શું રિએક્શન છે? જો તેની સાથે આવું જ કંઈક થાય તો તે શું કરશે?

રુપાલીએ કહ્યું કે, 'શોના હાલના ટ્રેકમાં અનુપમા સાથે તેનો પતિ વિશ્વાસઘાત કરે છે. પ્રામાણિકતાથી કહું તો, આ સ્થિતિની સરખામણી હું મારા જીવન સાથે કરી શકું નહીં. મારો પતિ અશ્વિન કે. વર્મા ખૂબ દયાળુ માણસ છે અને હંમેશા મને સપોર્ટ આપે છે. તે મને ક્યારેય છેતરશે તેવી કલ્પના પણ હું કરી શકું નહીં. આ એવી બાબત છે જેની સાથે હું ક્યારેક પોતાની જાતને રિલેટ કરી શકું નહીં'.


રુપાલી અને અશ્વિનના લગ્ન વર્ષ 2013ના ફેબ્રુઆરી મહિનામાં લગ્ન કર્યા હતા. આ પહેલા તેઓ 12 વર્ષ સુધી ફ્રેન્ડ્સ રહ્યા હતા. તેમના રિલેશનશિપ વિશે વાત કરતાં એક્ટ્રેસે કહ્યું કે, 'અમે સ્ટ્રોન્ગ બોન્ડ શેર કરીએ છીએ. મને લાગે કે હું મારા બેસ્ટ ફ્રેન્ડને પરણી છું. સેટ પર શું કર્યું, શું થયું તે દરેક બાબત હું તેની સાથે શેર કરું છું. તેઓ પણ દરેક બાબત મારી સાથે શેર કરે છે. હું રોજ 14 કલાક સુધી શૂટિંગ કરું છું, તેથી અમને વધારે સમય સાથે પસાર કરવા માટે મળતો નથી. છતાં અમારું કનેક્શન ગજબ અને અમે એકબીજાની ક્લોઝ છીએ'.


અનુપમાનો રોલ કરતી એક્ટ્રેસ રૂપા ગાંગુલીની એક્ટિંગના પણ ખૂબ વખાણ થઈ રહ્યા છે. થોડા દિવસો પહેલા જ સીરિયલ 'અનુપમા'ના સેટ પર એક્ટ્રેસ રૂપાલીને મળવા તેનો રિયલ લાઈફ પતિ આવી પહોંચ્યો હતો. પતિને જોઈને રૂપાલી ખુશ થઈ ગઈ હતી. તેણે પતિ સાથેની તસવીર પોસ્ટ કરીને મજેદાર કેપ્શન પણ આપ્યું હતું.

'અનુપમા'ના ગેટઅપમાં જ રૂપાલીએ રિયલ લાઈફ પતિ અશ્વિન સાથે તસવીર ક્લિક કરાવી હતી. રૂપાલીએ તસવીર શેર કરતાં લખ્યું હતું કે, 'તું મારી સ્માઈલનું કારણ છે. જ્યારે પતિ સેટ પર મળવા આવીને સરપ્રાઈઝ આપે. સારું છે મારો અસલી પતિ સાહિલ સારાભાઈ જેવો છે વનરાજ શાહ જેવો નહીં 😂. અશ્વિન તું માતારાણી તરફથી મળેલા આશીર્વાદ છે. મને જિંદગીભર સહન કરવાની ધીરજ માતાજી તને આપે. 😂'.